Греция дрон ҳужумларидан сўнг Қора денгиздаги хатарлар ҳақида огоҳлантирди

Греция Денгизчилик вазирлиги Қора денгиздаги Россия портларига киришда хавфсизлик чораларини қайта кўриб чиқиш зарурлиги ҳақида ўз флотига огоҳлантириш берди. Бундай тавсия 13 январ куни грек компаниялари томонидан бошқарилган икки танкерга дронлар ҳужум қилганидан сўнг берилган, деб хабар қилди Reuters агентлиги пайшанба куни, 15 январда.

Фото: Yuri Bereznyuk/Tass/picture alliance

Вазирлик ҳужжатларидан бирида шундай дейилган: “Қора денгизда ва унга туташ денгиз ҳудудларида бўлиб турган тижорий кемаларга нисбатан таҳдидларни қайтадан баҳолаш тавсия этилади. Буни денгиз ташув компанияларининг хавфсизлик хизмати раҳбарлари, капитанлар ва грек кемаларининг хавфсизлик ходимлари амалга оширсин”. Reuters қайд этишича, ҳужумлар фонида кемаларни ҳарбий ҳаракатлардан суғурталаш қиймати кескин ошган.

Ҳужумга учраган Matilda танкерларидан бирини бошқарадиган Thenamaris компанияси вакили содир бўлган воқеадан кейин эҳтиёт чоралари кучайтирилганини билдирди. Экипажга ҳам ҳушёрроқ бўлиш ва палубада имкони борича камроқ ҳаракатланиш тавсия қилинган.

13 январ куни номаълум учувчисиз аппаратлар Қора денгизда Қозоғистон экспорт нефтини ташишда иштирок этган икки нефт танкерига ҳужум қилган. Гап Малта байроғи остида ҳаракатланган Matilda танкери ва Либерия байроғи остидаги Delta Harmony кемаси ҳақида кетмоқда. Кейинроқ маълум бўлишича, ҳар икки танкер ҳам грек компанияларига тегишли бўлган ва жиддий зарар кўрмаган. Экипаж аъзолари ҳам жабрланмаган.

Дронлар қаердан учиб келгани ва ҳужум учун ким жавобгар экани ҳозирча номаълум. Шу билан бирга, Германиянинг dpa агентлиги Новороссийск порти яқинида кемаларга ҳужум қилган дронларни украин дронлари деб атаган.

Тайёрлаган: Отабек Матназаров

#Греция #Қора денгиз #дрон