Аргентинада дунёдаги иккинчи йирик футбол стадиони пайдо бўлади

Аргентинанинг «Ривер Плейт» клуби ўзига тегишли «Монументал» стадионини кенгайтириш лойиҳасини бошлаганини эълон қилди.

Арена сиғимини ҳозирги 85 мингдан 101 минг томошабинга ошириш режалаштирилган.

«Бу тарихий кун. «Ривер Плейт» спорт инфратузилмасини модернизация қилиш, ривожлантириш ва етакчилик қилиш йўлини давом эттирмоқда, стадионнинг Америкадаги энг йирик ва аҳамиятли мақомини мустаҳкамлаб, янги жаҳон стандартини ўрнатмоқда», деди клуб президенти Стефано ди Карло.

Қурилиш ишлари апрел ойида бошланиши режалаштирилган. Лойиҳа ўнта етакчи қурилиш компанияси иштирокида танлов асосида амалга оширилади. Ишларнинг тахминий қиймати 100 миллион доллардан ошади ва реконструкция қилишнинг умумий давомийлиги тахминан 36 ойни ташкил этади.

Ишлар якунлангач, «Монументал» дунёдаги иккинчи энг катта футбол аренасига айланади. Номинал жиҳатдан энг катта футбол стадиони Пхеняндаги «Биринчи Май Рунградо» стадиони (114 минг ўринли) бўлиб қолмоқда, аммо у охирги марта 2017 йилда футбол ўйинларига мезбонлик қилган. Реконструкциядан сўнг фаол фойдаланилаётган ареналар орасида Барселонадаги «Камп Ноу» (105 минг ўринли) етакчилик қиляпти.

«Монументал» стадиони 1938 йилда қурилган. Унинг аренасида жаҳон чемпионати финали (1978), шунингдек, иккита Америка Кубоги финали (1987 ва 2011) ва Либертадорес Кубоги финали (2024) ўтказилган. «Монументал» 2030 йилги жаҳон чемпионати ўйинларидан бирига мезбонлик қилиши режалаштирилган.