Францияда Grinch танкерига нисбатан чеклов жорий этилди

Францияда Россиянинг “соя флоти”га алоқадорликда гумон қилинаётган Grinch танкерига нисбатан маъмурий чеклов жорий этилди. Илгари ҳибсга олинган, Ҳиндистон фуқароси бўлган кема капитани эса озод қилинди ва яна кемага қайтди.

Фото: Gilles Bader/MAXPPP

Франция чоршанба, 28 январ куни Россиянинг “соя флоти”га алоқадорликда гумон қилиниб ушланган Grinch нефт танкерига нисбатан маъмурий чеклов жорий қилди. Бу ҳақда Reuters Марсел прокуратурасининг баёнотига таяниб хабар берди. 58 ёшли, Ҳиндистон фуқароси бўлган танкер капитани олдинроқ қўлга олинган эди, у озод қилинди ва бортга қайтди.

Франциянинг BFMTV телеканалига кўра, танкер Мурманскдан йўлга чиққан ва Комор оролларининг сохта байроғи остида ҳаракатланган. Ушланганидан кейин кема Марсел–Фос портига йўналтирилган. BFMTV, шунингдек, Grinch танкери Буюк Британиянинг санкциялар рўйхатига киритилгани ҳамда ЕИ ва АҚШ санкциялари остида эканини, аммо уларнинг “қора рўйхати”да бошқа номлар билан қайд этилганини кўрсатади. Кема асосан нефт маҳсулотларини Хитой ва Ҳиндистонга экспорт қилиш билан шуғулланади.

Grinch танкери 22 январ куни Ўрта Ер денгизида ушланганидан кейин, Франция президенти Эммануэл Макрон операция вақтида Францияни бир қатор иттифоқчилар, жумладан Буюк Британия қўллаб-қувватлаганини билдирди. У, шунингдек, кема халқаро санкциялар остида экани ва эҳтимол, сохта байроқ остида юрганини айтди.

Россиянинг “соя флоти” асосан эски кемалардан иборат бўлиб, улар ғарб суғурта ва рўйхатдан ўтказиш тизимларидан ташқарида ишлатилади. Шу орқали РФ Украинага кенг кўламли ҳужумдан кейин жорий қилинган Европа Иттифоқи санкцияларини четлаб ўтади. Нефт сотувидан тушган даромадлар, жумладан Ҳиндистон ва Хитой каби мамлакатларга арзонроқ нархларда сотишдан олинадиган маблағлар ҳам, урушни молиялаштиришга йўналтирилади.