Ўзбекистонда қимматбаҳо тошларни халқаро стандартда сертификатлаш бошланди

Пойтахтда заргарлик буюмлари, қимматбаҳо тошлар ва олмосларни сертификатлашга ихтисослашган янги геммология маркази иш бошлади. Марказ халқаро стандартлар асосида экспертиза ва сертификатлаш хизматларини кўрсатади.

Фото: "Дунё" АА

Тошкентда GCI Gemological Centers Uzbekistan геммология марказининг тантанали очилиш маросими бўлиб ўтди. Ушбу марказ 2025 йил август ойида Тель-Авив шаҳрида GCI Gemological Centers Ltd. ва Ўзбекистоннинг Expert One МЧЖ ўртасида тузилган шартнома асосида, мамлакатнинг Исроилдаги элчихонаси кўмагида ташкил этилди.

GCI Gemological Centers Ltd. бош офиси Тел-Авивда жойлашган бўлиб, қимматбаҳо тошларни экспертизадан ўтказиш, баҳолаш ва сертификатлаш бўйича халқаро миқёсда тан олинган хизматларни тақдим этади. Компания шунингдек, геммология соҳасида профессионал мутахассислар тайёрлайди.

Тошкент филиалининг очилиш маросимида Исроил элчиси Гидеон Лустиг, New Uzbekistan Uzbekistan–Israel Trade and Investment House президенти Наргиза Қодирова ҳамда компания расмий вакиллари иштирок этди.

Исроиллик вакиллар таъкидлашича, марказнинг очилиши Ўзбекистонда заргарлик соҳасида амалга оширилган кенг кўламли ислоҳотлар самарасидир. Қимматбаҳо металлар ва тошлар бозорини либераллаштириш, халқаро стандартларни жорий этиш ва хусусий секторни қўллаб-қувватлаш мамлакатни соҳанинг етакчи глобал иштирокчилари учун жозибадор ҳамкорга айлантирмоқда.

Тошкентдаги янги марказ комплекс гемологик тадқиқотлар ўтказиш, халқаро GCI сертификатларини бериш ва заргарлик саноати мутахассислари учун таълим дастурларини амалга оширади. У компаниянинг Марказий Осиёдаги биринчи ва дунёдаги учинчи филиалига айланди.