Германияда журналистларга қарши жиноятлар сони кескин ошди

Ҳужжатга кўра, 2024 йил 1 апрелдан 2025 йил 30 ноябргача бўлган даврда Германия Федерал жиноят ишлари идораси (BKA) матбуотга нисбатан 818 та сиёсий сабабга эга жиноятни қайд этган, шулардан 89 таси — зўравонлик билан боғлиқ. Ўртача ҳисобда бу ойига тахминан 41 та ҳолат дегани, бу эса 2023 йил даражасидан 71 фоиз юқори (2023 йилда 290 та ҳолат, яъни ойига тахминан 24 та).

Энг кўп жиноятларни — тахминан учдан бир қисмини (244 та) — ҳокимиятлар “ўнг экстремизм” тоифасига киритган, яна 78 та ҳолат “сўл экстремизм” сифатида таснифланган. 153 марта журналистларга нисбатан қонун “хорижий мафкура” сабаб бузилган, 31 марта — “диний мафкура” сабаб. Яна 312 та ҳуқуқбузарлик “бошқа” тоифага тушган, чунки уларни юқоридаги тўрт гуруҳдан бирортасига аниқ киритиш имконсиз бўлган.

Шу билан бирга, Германия пойтахти Берлинда ОАВ ходимларига нисбатан 406 та жиноят қайд этилган — бу барча ҳолатларнинг деярли ярми. Кейинги ўринларда Саксония (82 та), Бавария (64 та) ва Шимолий Рейн – Вестфалия (55 та) келади.

Қайд этилишича, 211 та қонунбузарлик намойишлар вақтида содир этилган. Улар орасида 73 та зўравонлик жинояти бор — яъни зўравонлик билан боғлиқ барча жиноятларнинг 82 фоизи.

Интернетда журналистларга қарши содир этилаётган ҳуқуқбузарликлар сони ҳам ўсмоқда. 2024 йилда BKA бундай 217 та ҳолатни қайд этган бўлса, 2025 йилда кўрсаткич 333 тага етган. Кўп ҳолларда гап нафрат қўзғатиш ҳақида кетган.

Инсон ҳуқуқларини ҳимоя қилувчи “Чегара билмас мухбирлар” ташкилоти 2024 йилда Германияда ОАВ ходимлари ва таҳририятларга қарши 89 та ҳужумни ҳужжатлаштирган, 2025 йилда эса — 55 та. Кўпинча ҳужумчилар журналистларни оёқ ва мушт билан урган, баъзан эса турли буюмлардан ҳам фойдаланган.