Каллас европаликларни Путин билан алоқаларни мувофиқлаштиришга чақирди

Европада РФ президенти Владимир Путин билан тўғридан тўғри мулоқотни қайта тиклаш зарурлиги ҳақидаги баҳслар кучаяётган бир пайтда, ЕИнинг ташқи ишлар ва хавфсизлик сиёсати бўйича олий вакили Кая Каллас бундай қадамларни Европа даражасида мувофиқлаштиришга чақирди.

Фото: Frederic GARRIDO-RAMIREZ

“Келинглар, ким россияликлар билан гаплашиши ҳақида муҳокама қилишдан олдин, аввало россияликлар билан нима ҳақда гаплашмоқчи эканимизни муҳокама қилайлик”, — деди у сешанба куни, 10 февралда Брюсселда бир неча ОАВ журналистларига берган интервюсида.

AFP агентлиги унинг сўзларини келтириб, Каллас: “Яқин кунларда биз узоқ муддатли ва барқарор тинчликка эришиш учун нимани кўришни исташимиз ҳақида ғояларни ишлаб чиқамиз”, — деганини ёзади. Шундан сўнг тегишли рўйхат ЕИ аъзо давлатларига юборилади, дея қўшимча қилди Каллас.

Шу куни Франция президенти Эммануэл Макроннинг Европа газеталарига берган интервюси ҳам эълон қилинди, унда у европаликларнинг Кремл билан тўғридан тўғри мулоқотни қайта тиклаши зарурлигини яна бир бор таъкидлади. Макрон феврал ойи бошида Россия раҳбарияти билан тўғридан тўғри алоқаларга тайёргарлик кўриш учун ўзининг дипломатик маслаҳатчисини Москвага юборганини тасдиқлади. “Мен нимага эришдим? Россия ҳозир тинчликни истамаётганининг тасдиғига. Лекин, энг муҳими, биз бу муҳокама каналларини техник даражада қайта тикладик”, — деди у.

Макроннинг айтишича, энди у бу тажрибани европалик ҳамкорлари билан бўлишишни режалаштирмоқда, токи Кремл билан мулоқот учун “яхши ташкил этилган Европа ёндашуви” шакллантирилиши даркор. Унга кўра, бу мулоқот “жуда кўп сонли суҳбатдошларсиз, олдиндан белгиланган мандат билан ва оддий вакиллик асосида” бўлиши керак. Макрон, шунингдек, бу ўзаро мулоқотни Вашингтонга топширишга қарши чиқди — АҚШ аллақачон РФ билан музокара олиб боряпти. Унинг фикрича, ўт очиш тўхтатилган тақдирда Украинанинг ЕИга қачон кириши масаласини Европа номидан америкалик элчилар муҳокама қилиб қўйишига йўл қўйиб бўлмайди.

Тўғридан тўғри алоқаларни тиклаш ғоясини, жумладан, Болтиқ мамлакатлари ва Чехияда ҳам қўллаб-қувватлашган. Германия канцлери Фридрих Мерц эса Москва билан мулоқотни қайта бошлаш бўйича “мувофиқлаштирилмаган алоҳида қадамлар”ни қоралади. Унинг таъкидлашича, урушни тўхтатишга қаратилган барча Европа саъй-ҳаракатлари Европанинг ўзида, шунингдек Украина ва АҚШ билан ҳам мувофиқлаштирилган бўлиши керак.