Қирғизистон парламенти спикери ҳам лавозимини тарк этди

Қирғизистон парламенти (Жогорку Кенеш) спикери (тўроға) Нурланбек Турғунбек ўғли (Нурланбек Шакиев) истеъфога чиқди. Бу ҳақда унинг ўзи парламент йиғилишида эълон қилди.

У ўз қарорини ихтиёрий равишда қабул қилгани ва унга ҳеч қандай босим бўлмаганини билдирган.

«Қароримни муайян одамлар билан боғлашни нотўғри деб ҳисоблайман. Қайд этишим керакки, мен ҳеч қачон бир ёки икки киши учун ишламаганман, мен ҳар доим мамлакат, қирғиз халқи манфаатлари учун ишлаганман.

Ўтган вақт мобайнида мен мамлакатда муҳим ва керакли қарорлар қабул қилинишига ўз ҳиссамни қўшдим. Сиёсий барқарорликни сақлаш учун фитналарсиз ишлашни ўрганишимиз керак», – деган сиёсатчи.

У фаолиятини депутат сифатида давом эттиришини қўшимча қилган.

Маҳаллий манбаларга кўра, Марлен Маматалиев парламентнинг янги тўроғаси бўлиши кутилмоқда.

10 феврал куни президент Садир Жапаров Қирғизистон Миллий хавфсизлик давлат қўмитаси раиси Қамчибек Ташиевни истеъфога чиқарганди. Бу истеъфо ортидан ОАВда шу кунларда Туркияда хизмат сафари билан бўлиб турган парламент тўроғаси ҳам лавозимини тарк этиши ҳақида хабарлар тарқалганди.

Шу билан бирга, Миллий хавфсизлик давлат қўмитаси ваколатлари кескин қисқартирилмоқда. Хусусан, Давлат чегара хизмати алоҳида мустақил тузилмага айлантирилди, қўмитанинг 9-хизмати ҳам алоҳида ажратилиб, мамлакат биринчи раҳбарлари хавфсизлигини таъминлайдиган Давлат қўриқлаш хизмати ташкил этилди. У тўлиқ президентга бўйсунади.