Медет Назаров гигант-слалом дастуридаги иштирокини якунлади

Тоғ чанғиси бўйича Ўзбекистон терма жамоаси аъзоси Медет Назаров Милан-Кортина-2026 қишки Олимпия ўйинларида ҳамюртларимизнинг иштирокини бошлаб берди.

Фото: МОҚ

Гигант-слалом дастурининг 1-стартида қатнашган Назаров 1:25.75 дақиқа натижа кўрсатди.

Иккинчи стартда эса дастлабки уринишидан юқорироқ натижа кўрсатишга эришди (1:21.14).

Икки старт якунида 2:46.89 дақиқа қайд этган Медет Назаров ушбу дастурни 50-поғонада якунлади.

Ўзбекистон қишки Олимпиадада икки нафар спортчи билан қатнашмоқда. Медет Назаровдан ташқари, Даниил Ейбог шорт-трекнинг 500 метр масофага югуриш мусобақасида мамлакат шарафини ҳимоя қилади.

Аслида, қўлга киритилган йўлланмалар сони 4 та эди: Дмитрий Чигирев ва Екатерина Гейниш фигурали учишнинг жуфтлик йўналишида саралашдан ўтган эди. Лекин Чигирев тайёргарлик жараёнида жароҳат олиб, Олимпиадагача тиклана олмади.

Мустақил Ўзбекистон байроғи остида спортчилар 1994 йилдан бери барча қишки олимпиада ўйинларида иштирок этмоқда. Энг кўп вакил айнан шу йили Норвегиянинг Лиллеҳаммер шаҳридаги ўйинларда қайд этилган – 7 нафар. Шунингдек, Ўзбекистон қишки олимпиадалардаги ягона медалини ҳам шу йили қўлга киритган – Лина Черязова чанғида фристайл спорт турида олтин медал.

4 йил олдин Пекинда ўтказилган қишки Олимпиада ўйинларида Ўзбекистон бир нафар спортчи билан қатнашган эди – Комилжон Тўхтаев тоғ-чанғи спорт турида.