Даниил Ейбог Олимпиададаги 1500 метрлик баҳсларни 14-ўринда якунлади

Ўзбекистонлик шорт-трекчи Даниил Ейбог Италияда ўтаётган қишки Олимпиада ўйинларида 1500 метр масофада кечган чорак финал босқичидан муваффақиятли ўтди.

Ейбог ўз гуруҳида 2:16.963 вақт билан 3-бўлиб финишга етиб келди ва ярим финалга йўл олди.

Ярим финалдаги чиқишида эса 2 дақиқа 18 сония натижа билан 3-бўлиб финишга келди.

Бу “А” финалига йўлланма олиш учун етарли бўлмади ва у “В” финалида 10-16-ўринлар учун кураш олиб борди. “В” финалида қатнашган Ейбог маррага 5-бўлиб етиб келди.

Ушбу натижа билан у мазкур масофадаги чиқишини 14-поғонада тугатди.

Кеча, 14 феврал куни тоғ чанғиси бўйича Ўзбекистон терма жамоаси аъзоси Медет Назаров гигант-слалом дастуридаги иштирокини тўхтатганди.

Икки старт якунида 2:46.89 дақиқа қайд этган Медет Назаров ушбу дастурни 50-поғонада якунлади.

Ўзбекистон қишки Олимпиадада икки нафар спортчи билан қатнашмоқда. Аслида, қўлга киритилган йўлланмалар сони 4 та эди: Дмитрий Чигирев ва Екатерина Гейниш фигурали учишнинг жуфтлик йўналишида саралашдан ўтган эди. Лекин Чигирев тайёргарлик жараёнида жароҳат олиб, Олимпиадагача тиклана олмади.