Норинда кундузги парвариш хизмати тарбияланувчиси ЙТҲ оқибатида ҳалок бўлди

18 февраль куни «Умид чироғи» кундузги парвариш хизмати тарбияланувчиларини марказга олиб кетиш жараёнида йўл-транспорт ҳодисаси содир бўлди. Транспорт воситасида 6 нафар бола бўлган. Ҳодиса оқибатида улардан бири ҳалок бўлган.

Фото: Ижтимоий тармоқлар

Наманган вилояти, Норин туманида «Умид чироғи» кундузги парвариш хизмати тарбияланувчиси йўл-транспорт ҳодисаси оқибатида ҳалок бўлди. Бу ҳақда Ижтимоий ҳимоя миллий агентлиги хабар берди.

Қайд қилинишича, 18 февраль куни соат 8:30 атрофида Норин туманида жойлашган «Умид чироғи» кундузги парвариш хизмати тарбияланувчиларини марказга олиб кетиш жараёнида йўл-транспорт ҳодисаси содир бўлди. Транспорт воситасида 6 нафар бола бўлган. Ҳодиса оқибатида тарбияланувчилардан бири — 2015 йилда туғилган Ш.Х. оғир тан жароҳати оқибатида ҳалок бўлган.

Таъкидланишича, қолган 5 нафар болага Норин туман тиббиёт бирлашмасида биринчи тиббий ёрдам кўрсатилган ва уларнинг ҳолати қониқарли деб баҳоланмоқда.

Ҳолат юзасидан ҳуқуқни муҳофаза қилувчи органлар томонидан текширув ишлари олиб борилмоқда.