Буюк Британия қиролининг укаси Эндрю озодликка чиқарилди

Буюк Британия қироли Чарлз IIIнинг кичик укаси Эндрю Маунтбеттен-Виндзор 19 феврал, пайшанба куни америкалик молиячи Жеффри Эпштейн билан алоқалари бўйича олиб борилаётган тергов фонида қўлга олинган эди. Ўша куннинг кечаси у қарийб 12 соатлик сўроқдан кейин полиция бўлимидан озодликка қўйиб юборилди. Бу ҳақда хабар берган BBC телеканали ҳамда бир қатор газеталар маълумотни тасдиқлаш учун фотосуратни эълон қилди: унда 66 ёшли Маунтбеттен-Виндзор қоронғи тушганидан кейин Англиянинг Норфолк графлигидаги Айлшамда жойлашган полиция бўлими ҳудудидан чиқиб кетаётган автомобилнинг орқа ўриндиғида ўтиргани акс этган.

Полиция баёнот тарқатиб, собиқ шаҳзода давлат хизматида қонунга хилоф ҳаракатлар содир этган бўлиши мумкин, деган гумон билан ҳибсга олинганидан кейин “тергов остида озод қилингани”ни маълум қилди. Бу — тергов давом этаётганини, бироқ Маунтбеттен-Виндзорга ҳали айблов қўйилмаганини англатади.

Полициянинг Эндрю Маунтбеттен-Виндзор ушлангани ҳақидаги эрталабки хабарида унинг исми тўғридан тўғри айтилмаган. Ушланган киши ким, деган саволга полиция “60 ёшдан катта эркак киши ҳибсга олинди”, деб жавоб берган. Шу иш бўйича икки манзилда тинтувлар ўтказилаётгани ҳам хабар қилинди.

AP агентлиги хабар беришича, полиция собиқ шаҳзода Эндрю 2010 йилда жинсий жиноятлари учун судланган Жеффри Эпштейнга савдо ҳисоботларини юборгани ҳақидаги маълумотларни ўрганмоқда. Полиция бу иш билан Эпштейн иши бўйича АҚШдаги тергов жараёнида тўпланган миллионлаб саҳифадан иборат ҳужжатлар эълон қилинганидан кейин шуғуллана бошлаган.

Полиция баёнотига кўра, қироллик оиласи аъзоси расмий лавозимларда бўлган даврида ўз мавқеини суиистеъмол қилган бўлиши мумкин, деб гумон қилинмоқда. Аввалроқ Эндрю шаҳзода унвонидан маҳрум этилган — бу унинг Эпштейн билан яқин алоқалари ҳақида маълум бўлганидан кейин содир бўлган. Эпштейн вояга етмаганларни жинсий эксплуатация қилиш (жинсий савдо) айбловлари билан тилга олинган ва 2019 йилда қамоқхонадаги камерасида осилган ҳолда топилган.

Маунтбеттен-Виндзор эса Эпштейн иши билан боғлиқ ҳар қандай қонунбузарликни доимо инкор қилиб келган ва у билан дўст бўлганидан афсусда эканини айтган.

Карл III укасининг ҳибсга олингани ҳақидаги хабардан “жуда ташвишда” эканини билдирган, бироқ қироллик оиласи ҳуқуқни муҳофаза қилувчи органларга ҳар томонлама қўллаб-қувватлов кўрсатишини ваъда қилган. Уларнинг олдида “тўлиқ ва адолатли тергов” ўтказиш вазифаси тургани таъкидланган.

“Илтимос, мен аниқ айтиб қўяй: қонун ғалаба қилиши керак. Бу жараён давом этаётган бир пайтда, менинг бу масала юзасидан бундан ортиқ изоҳ беришим ўринсиз бўлар эди. Шу орада эса, менинг оилам ва мен ўз бурчимизни бажаришда ва сизларнинг барчангизга хизмат қилишда давом этамиз”, — дейилади Буюк Британия қиролининг баёнотида.