Сеулдаги РФ элчихонаси “Ғалаба бизники бўлади” баннерини олиб ташлади

Жанубий Кореядаги Россия элчихонаси сешанба куни, 24 февралда, ташқи деворда икки кун осилиб турган “Ғалаба бизники бўлади” деган ёзувли 15 метрлик баннерни олиб ташлади. Бу ҳақда “Ренхап” агентлиги хабар берди.

Фото: Kim Hong-Ji/REUTERS

Бундан олдин Сеул ушбу баннердан хавотир билдириб, мазкур шиор Россиянинг Украинага қарши урушига ишора сифатида қабул қилиниши мумкинлиги ва шу сабабли РФнинг бошқа давлатлар билан муносабатларида “кескинлик келтириб чиқариши” эҳтимоли борлигини айтган. Баннер 22 феврал куни — Россиянинг Украинага тўлақонли босқини бошланганининг тўрт йиллиги арафасида осиб қўйилган эди.

Баннерни олиб ташлаш қарори айнан нима билан боғлиқ эканини элчихона тушунтирмаган. Бироқ “Ренхап” жамоатчилик танқидига ишора қилади: хусусан, жанубий кореялик фаоллар ва айрим россияликлар элчихона биноси олдида якка тартибда пикетлар сериясига чиққан. Масалан, Hwalbindan жамоат ташкилоти раҳбари Хон Чон Сик “Путинни тўхтатинг. Урушни тўхтатинг” деган ёзувли плакатни ушлаб, “Бу бадбашара плакатни олиб ташланг” ва “Корея Республикаси урушга қарши” деган шиорларни айтгани агентлик томонидан келтирилади.

Бундан ташқари, Россия дипломатик ваколатхонаси ватан ҳимоячилари кунига бағишланган тадбирни ҳам бекор қилди. У Сеул марказида, элчихона олдида кўчада ўтказилиши керак эди, аммо “охирги дақиқада” уни бинo ичига кўчиришган.

22 феврал куни эса РФ элчихонаси Жанубий Корея ТИВ билдирган хавотирга жавобан, баннерни жойлаштириш “россияликларнинг ватанпарварлик асосида бирлашувига хизмат қилади” дея билдирган эди.