Seuldagi RF elchixonasi “G‘alaba bizniki bo‘ladi” bannerini olib tashladi

Bundan oldin Seul ushbu bannerdan xavotir bildirib, mazkur shior Rossiyaning Ukrainaga qarshi urushiga ishora sifatida qabul qilinishi mumkinligi va shu sababli RFning boshqa davlatlar bilan munosabatlarida “keskinlik keltirib chiqarishi” ehtimoli borligini aytgan. Banner 22 fevral kuni — Rossiyaning Ukrainaga to‘laqonli bosqini boshlanganining to‘rt yilligi arafasida osib qo‘yilgan edi.

Bannerni olib tashlash qarori aynan nima bilan bog‘liq ekanini elchixona tushuntirmagan. Biroq “Renxap” jamoatchilik tanqidiga ishora qiladi: xususan, janubiy koreyalik faollar va ayrim rossiyaliklar elchixona binosi oldida yakka tartibda piketlar seriyasiga chiqqan. Masalan, Hwalbindan jamoat tashkiloti rahbari Xon Chon Sik “Putinni to‘xtating. Urushni to‘xtating” degan yozuvli plakatni ushlab, “Bu badbashara plakatni olib tashlang” va “Koreya Respublikasi urushga qarshi” degan shiorlarni aytgani agentlik tomonidan keltiriladi.

Bundan tashqari, Rossiya diplomatik vakolatxonasi vatan himoyachilari kuniga bag‘ishlangan tadbirni ham bekor qildi. U Seul markazida, elchixona oldida ko‘chada o‘tkazilishi kerak edi, ammo “oxirgi daqiqada” uni bino ichiga ko‘chirishgan.

22 fevral kuni esa RF elchixonasi Janubiy Koreya TIV bildirgan xavotirga javoban, bannerni joylashtirish “rossiyaliklarning vatanparvarlik asosida birlashuviga xizmat qiladi” deya bildirgan edi.