Испания бош вазири Эрондаги урушга қарши позициясини тасдиқлади

АҚШ президенти Доналд Трамп таҳдидларига қарамай, Испания бош вазири Педро Санчес ўз позициясидан қайтмаяпти ва АҚШ ҳамда Исроилнинг Эронга қарши урушига танқидий муносабат билдирмоқда. Испания Эрон билан давом этаётган уруш — “инсоният учун ҳалокат”га қарши, деди у 4 март, чоршанба куни испан халқига телемурожаатида.

Санчес “ўтмиш хатолари”ни такрорламасликка чақирди ва бу билан 2003 йилда АҚШ иштирокида халқаро коалициянинг Ироққа бостириб киришини назарда тутди. Унинг айтишича, ўша уруш эълон қилинган мақсадларга эришмаган, аммо минтақада беқарорликка олиб келган ва аҳоли ҳаётини оғирлаштирган.

“Испания ҳукумати позициясини шундай сўзлар билан ифода этиш мумкин: ‘урушга йўқ’. Биз фақат қасосдан қўрққанимиз учун тинчликка зарар етказадиган, қадриятларимиз ва манфаатларимизга зид бўлган ишда шерик бўлмаймиз, — деди Санчес. — Катта инсоний фожиалар айнан шундай бошланади”.

Испания бош вазири “миллионлаб одамлар тақдири билан рус рулеткаси ўйнаманг”, деди. Унинг сўзларига кўра, бу позицияни “кўплаб бошқа ҳукуматлар” ҳамда “Европа, Шимолий Америка ва Яқин Шарқ бўйлаб миллионлаб фуқаролар — янги урушлар ва эртанги ноаниқликни истамайдиганлар” қўллаб-қувватлаяпти.

Еврокомиссия Мадрид билан якдил эканини билдирди. Идора вакили айтишича, Брюссел “Европа Иттифоқи манфаатларини ҳимоя қилишни таъминлайди” ва “умумий савдо сиёсати доирасида ҳаракат қилишга тайёр”. Шунингдек, Брюсселда АҚШ ўтган ёзда ЕИ билан тузилган савдо келишувига риоя қилиши шартлиги эслатилди.

Франция президенти Эммануэл Макрон ҳам Трамп таҳдидлари фонида Санчесни қўллаб-қувватлади. Елисей саройи маълум қилишича, Макрон Испания бош вазири билан музокара ўтказиб, АҚШ томонидан “яқинда айтилган иқтисодий мажбурлаш таҳдидлари”га қарши Франциянинг “европача якдиллиги”ни билдирган.

Бундан бир кун олдин Вашингтонда ГФР канцлери Фридрих Мерц билан учрашувда Трамп Испания билан “бутун савдони узиб ташлаши”ни айтган ва Испания ҳаракатларини “даҳшатли” ҳамда “жуда ҳам ҳамкорликка мойил эмас” деб атаган. Бу билан у Санчеснинг АҚШга Эронга зарба бериш учун Испания ҳарбий базаларидан фойдаланишга рухсат беришни рад этганига жавоб қайтарган.

Ўз навбатида, Мерц камералар олдида Испанияга очиқдан очиқ якдиллик билдиришдан қочди. Аксинча, у АҚШ маъмурияти билан Эрон ядровий келишуви бўйича умумий позиция борлигини кўрсатишга уриниб, буни алоҳида таъкидлади. Трамп Испанияни мудофаа харажатларини оширишдан бош тортгани учун танқид қилганида, Мерц уни қўллаб-қувватлади ва Испания НАТО қарорларига амал қилиши кераклигини билдирди.

Мадридда Мерцнинг Вашингтондаги баёнотлари танқид қилингач, у Трампга европаликлар позициясини ёпиқ эшиклар ортида “жуда аниқ” баён қилганини ва “мунозарани омма олдида кескинлаштириш”ни истамаганини тушунтирди. У шунингдек, НАТОга қўшилаётган ҳисса ҳақидаги танқид “Европанинг савдо келишувига эришиш борасидаги саъй-ҳаракатларига ҳеч қандай алоқаси йўқ”, деб қўшимча қилди.

Аввалроқ Мадрид АҚШга Эронга зарба бериш учун ўз ҳарбий базаларини тақдим этишни рад этишини “асоссиз ва хавфли ҳарбий интервенция” дея асослаган эди.