MacBook Neo — Apple’нинг энг ҳамёнбоп янги ноутбуги

MacBook Neo — одатда iPhone’да қўлланадиган чипда ишлайдиган илк Apple ноутбуги бўлиб, унинг бошланғич нархи 599 долларни ташкил қилади. Бу Apple’нинг Windows ва Chromebook фойдаланувчиларини жалб қилиш, шунингдек, бутун бозорни безовта қилаётган давомли компонентлар танқислиги шароитида ўсиш суръатини оширишга қаратилган янги уринишидан далолат беради.

Apple’нинг аппарат таъминоти муҳандислиги бўйича катта вице-президенти Жон Тернус чоршанба куни Ню-Йоркда бўлиб ўтган тадбирда MacBook Neo’ни «бутунлай янги» ва «нолдан яратилган» қурилма деб таърифлади.

iPhone Apple учун энг катта даромад манбаи бўлиб қолмоқда, ундан кейин хизматлар бизнеси, сўнг эса кийиб юриладиган қурилмалар бўлими туради. Аммо Mac компютерлари iPhone ва Apple Watch фойдаланувчиларининг Apple маҳсулотлари ва хизматлари экотизими ичида қолишини таъминлашда жуда муҳим аҳамиятга эга. Apple ўзининг одатий стратегиясидан четга чиқиб, нархга сезгир истеъмолчиларга мурожаат қилмоқда — бу сегментни у шу пайтгача асосан PC ва Chromebook ишлаб чиқарувчиларига бўшатиб берган эди.

Саноат узоқ давом этаётган хотира танқислиги билан курашаётган бир пайтда, янги аудиторияларга чиқиш жуда муҳим бўлиши мумкин. Айрим таҳлилчилар фикрича, бу танқислик арзон ноутбуклар бозорига қаттиқ зарба беради.

Apple’нинг бошқа MacBook’лари билан таққослаганда, Neo кичикроқ экранга, камроқ хотирага эга ва янада ёрқин рангларда таклиф этилади, жумладан янги citrus сариқ ранги ҳам бор.

Бироқ уни Apple’нинг бошқа MacBook’ларидан ажратиб турадиган асосий омил, пастроқ нархидан ташқари, унинг Apple A18 Pro процессорида ишлашидир — бу iPhone 16 Pro’ни қувватлантирадиган чипга ўхшаш чип. Бу Apple тарихида биринчи марта компания мобил чипларидан бирини ноутбукни ишлатиш учун қўллаши бўлди.

Apple’нинг Mac дастурий таъминотини телефон чипида ишлата олиши, компания ўз аппарат ва дастурий таъминотини тўлиқ назорат қилиши афзаллигини кўрсатади, деди International Data Corporation тадқиқот менежери Житеш Убриани. Унинг айтишича, PC ишлаб чиқарувчилари одатда ноутбукларни лойиҳалаштиради ва ишлаб чиқаради, аммо Microsoft’нинг Windows ёки Google’нинг Chrome OS дастурий таъминотидан фойдаланади. (Microsoft PC аппарат таъминоти бозорида Surface ноутбуклари орқали кичик ўйинчи ҳисобланади.)

«Улар одатда енгилроқ (операцион тизим) учун хизмат қиладиган чипни олиб, унда оғирроқ (операцион тизим)ни ишга туширяпти», деди у. «Менимча, бу Apple’нинг оптималлаштириш қобилияти ҳақида жуда кўп нарсани англатади».

Apple дунёдаги энг йирик компютер сотувчиси эмас; бу унвон Lenovo’га тегишли. Gartner маълумотларига кўра, 2025 йил охирига келиб бозорнинг 27,2 фоиз улуши Lenovo ҳиссасига тўғри келган, Apple эса 9,4 фоиз улушга эга бўлган.

Бироқ Apple’нинг бозорга ёндашуви ҳам PC соҳасидаги рақобатчиларидан анча фарқ қилган. MacBook’лар шу пайтгача асосан қимматроқ бўлиб келган ва аксарият PC’дан фарқли равишда сенсорли экран вариантига эга эмас эди.

Янги MacBook Neo ана шу фарқлардан камида биттасини бартараф этишга уриниш ҳисобланади. Унда сенсорли экран йўқ, аммо у MacBook Air ёки Pro учун 1000 доллардан ортиқ тўлашни истамайдиган, бироқ iPad’га қараганда кўпроқ ноутбукка ўхшаш қурилмага эҳтиёж сезадиган истеъмолчиларга маъқул келиши мумкин.

Убриани фикрича, янги MacBook коллеж талабалари ва сарфлаш учун унча кўп маблағи бўлмаган ёшлар орасида оммабоп бўлади. Gartner таҳлилчиси Отом Станиш эса бу қурилма Apple’нинг Chromebooks одатда кучлироқ мавқега эга бўлган таълим муҳитидаги иштирокини ошириши мумкинлигини айтди.

Сунъий интеллектга ихтисослашган дата-марказларни қувватлантирадиган хотира турига талаб ошиб бораётгани сабабли, истеъмол маҳсулотлари учун компонентлар камаймоқда.

Gartner 2026 йилда PC нархлари 17 фоизга ошишини кутмоқда, International Data Corporation эса бу йил PC сотувлари 11,3 фоизга пасайишини тахмин қилмоқда.

Нархлар ошиши бошланишидан олдин айнан ҳозир арзон янги MacBook чиқариш Apple’га устунлик бериши мумкин. Бутун бозор қисқариши кутилса-да, Убрианига кўра, Apple’да пасайиш унчалик кескин бўлмайди, чунки компания бозор улушининг бир қисмини қўлга киритиши кутилмоқда.

«Бу улушнинг ўсиши асосан мана шу қурилма ҳисобига бўлади», деди у.

Apple шу ҳафта янги ноутбук чиплари билан бирга янги MacBook Air ва MacBook Pro компютерларини ҳам тақдим қилди. MacBook Neo 11 март куни савдога чиқади.