Кения ТИВ: кенияликлар энди Украинадаги урушга ёлланмайди

Москвада Сергей Лавров билан учрашувдан сўнг Кения ташқи ишлар вазири Мусалия Мудавади кенияликлар энди Москва томонида Россиянинг Украинага қарши урушида қатнашишга жалб этилмаслигини маълум қилди.

Фото: Украина мудофаа разведкаси

Кения фуқаролари энди Россиянинг Украинага қарши урушида қатнашиш учун ёлланмайди. Бу ҳақда Кения ташқи ишлар вазири Мусалия Мудавади 16 март, душанба куни Москвада Россия ташқи ишлар вазири Сергей Лавров билан учрашувдан кейин берган баёнотида айтган.

Россиянинг ТАСС ахборот агентлиги Кения дипломатияси раҳбарининг қуйидаги сўзларини келтиради: «Вазир биз билан Россияда бўлиб турган кенияликлар масаласини муҳокама қилди. Биз шундай келишиб олдикки, кенияликлар энди мудофаа вазирлиги орқали (Россиянинг — таҳр.) қуролли кучларида хизматга жалб этилмайди. Кенияликлар энди МҲОда (Россиянинг Украинага қарши урушида — таҳр.) иштирок этишга жалб этилмайди. Биз бу келишувни қадрлаймиз».

Кения разведка хизматларининг феврал ойида мамлакат парламентига тақдим этилган маълумотларига кўра, Москва томонида Россиянинг Украинага қарши урушида қатнашиш учун 1000 нафардан ортиқ кениялик ёлланган.

Германиянинг Tagesschau ахборот дастури ўз сайтида бошқа ОАВ суриштирувларига таяниб ёзишича, улар Россияга Найробидаги кадрлар танлаш фирмаси орқали юборилган. Ушбу фирма уларга сотувчи ва шунга ўхшаш иш ўринларини ваъда қилган. Аммо натижада кенияликлар фронтга тушиб қолган.

Ўз навбатида, Украина ҳозирга қадар Россия ҳарбийлари сафида ушбу қитъанинг 36 давлатига мансуб 1780 нафардан ортиқ африкаликни аниқлашга муваффақ бўлганини маълум қилмоқда. Tagesschau таъкидлашича, бундай аскарларнинг ҳақиқий сони анча кўп бўлиши мумкин, чунки уларнинг кўпчилиги урушда иштирок этиш учун норасмий тарзда ёлланади.

Москвага ташрифидан олдин Кения ташқи ишлар вазири ўз мамлакатининг фуқаролари Россия қуролли кучлари сафида «ихтиёрий ёки ихтиёрсиз» тарзда жанг қилаётганини айтган эди. Шу билан бирга, Мусалия Мудавади Кения ҳукумати номидан сохта иш эълонлари орқали ёллашга қарши курашиш учун кучайтирилган чоралар кўрилишини ваъда қилган.

Шу орада, Сергей Лавров Мудавади билан учрашув якунлари бўйича ўтказилган матбуот анжуманида «барча кениялик фуқаролар, худди бошқа давлатлар фуқаролари каби» Россиянинг Украинага қарши урушида «ихтиёрий асосда, Россия қонунчилигига тўлиқ мувофиқ равишда» иштирок этаётганини таъкидлади. Шу билан бирга, у шартномани муддатидан олдин бекор қилиш имконияти ҳам борлигини кўрсатиб ўтди.