ФИФА офсайдни аниқлаш қоидаларига ўзгартириш киритди

Энди ҳужум қилаётган футболчи ҳимоячидан тўлиқ ўзиб кетган тақдирдагина «ўйиндан ташқари» ҳолатда бўлади. Янги қоидалар ҳали синов жараёнидан ўтиши керак.

Фото: Getty images

«Ёруғлик офсайди» (daylight offside) деб номланган янги талқин ФИФА томонидан эълон қилинди. Янги қоида ФИФА глобал футболни ривожлантириш бўйича раҳбари Арсен Венгер томонидан таклиф қилинган.

Энди ҳужум қилаётган футболчи ҳимоячидан тўлиқ ўзиб кетган тақдирдагина «ўйиндан ташқари» ҳолатда бўлади - улар ўртасида кўринадиган бўшлиқ бўлиши керак. Агар гол уришга рухсат берилган тананинг исталган қисми ҳимоячи билан бир чизиқда бўлса, офсайд қайд этилмайди.

«Бу муҳим синов лойиҳаси. Ушбу янги талқинни профессионал мусобақаларда синаб кўриш орқали биз унинг ўйинга қандай таъсир қилишини, жумладан, ўйиннинг аниқлиги ва динамикасини ошириш, шунингдек, ҳужумкор ўйинни тарғиб қилиш нуқтаи назаридан яхшироқ тушунишимиз мумкин», деб Венгернинг сўзларини келтирди ФИФА матбуот хизмати.

Шу билан бирга, биринчи марта Football Video Support (FVS) тизими - махсус видео ҳакамларсиз соддалаштирилган VAR муқобили ҳам синовдан ўтказилади. Бош мураббийлар гол, пенальти, қизил карта ёки футболчини нотўғри жазолаш эпизодларида яққол хатога йўл қўйилганда чекланган миқдорда видео кўриш сўровларини юбориши мумкин бўлади. Бунинг учун мураббий вазиятдан сўнг дарҳол махсус картани тўртинчи ҳакамга бериши керак.

Қайд этилишича, янги FVS тизими VAR ўрнини босмайди, балки ҳакамларга қарор қабул қилишда ёрдам беради.

Энди янги қоидалар Канада чемпионатида синовдан ўтказилади.