Бағдодда америкалик журналист аёл ўғирлаб кетилди

Америкалик мустақил журналист Шелли Китлсон Ироқ пойтахтида фуқаролик кийимидаги шахслар томонидан ўғирлаб кетилди. Китлсон Яқин Шарқдаги бир қанча урушларни ёритган ҳамда хорижий нашрлар учун материаллар тайёрлаб келган.

Шеллй Китлсон / Фото: Al-Monitor

Сешанба куни Ироқ пойтахти Бағдодда америкалик журналист аёл ўғирлаб кетилди. Reutersʼнинг ёзишича, Ироқ ички ишлар вазирлиги журналист ўғирлаб кетилганини тасдиқлаган, бироқ унинг фуқаролигини ошкор қилмади.

Вазирликнинг билдиришича, бир гумонланувчи қўлга олинган ва журналистни қидириш ҳамда озод қилиш бўйича ҳаракатлар давом этмоқда.

Кейинчалик жабрланувчининг шахси аниқланди: у Римда истиқомат қилувчи америкалик мустақил журналист Шелли Китлсон бўлган. Китлсон Яқин Шарқдаги бир қанча урушларни ёритган ҳамда Al-Monitor, Foreign Affairs каби нашрлар учун мақолалар тайёрлаб келган.

🚨 BREAKING: U.S. journalist Shelly Kittleson has been kidnapped in Baghdad, and authorities are actively searching for her, Iraq’s Interior Ministry confirms.

pic.twitter.com/vM8A9KyRCA
— Breaking911 (@Breaking911) March 31, 2026

Полиция мулозимлари сўзларига кўра, Китлсонни Саъдун кўчасидаги «Baghdad» меҳмонхонаси яқинида фуқаролик кийимидаги тўрт киши қўлга олиб, номаълум автомобилда олиб кетган. Қидирув ишлари пойтахтнинг шарқий қисмига қаратилган, чунки жиноятчиларнинг машинаси айнан ўша йўналишда ғойиб бўлган.

АҚШ Давлат департаменти расмийси Бағдодда америкалик журналист ўғирлаб кетилганидан хабардор эканини ва журналист бундай хавфдан огоҳлантирилганини айтди.

«Давлат департаменти аввалроқ ушбу шахсни унга нисбатан мавжуд таҳдидлар ҳақида огоҳлантириш бўйича ўз бурчини бажарган эди. Биз унинг имкон қадар тезроқ озод этилишини таъминлаш учун ФҚБ билан мувофиқлаштириш ишларини давом эттирамиз», деб ёзди департамент расмийси. Шунингдек, америкаликларга яна бир марта ҳар қандай сабаб билан Ироққа сафар қилмаслик тавсия этилди.

CNN нашрининг АҚШ Давлат департаментидаги манбаларига кўра, журналистни ўғирлашда қатнашганликда гумон қилиниб Ироқ ҳукумати томонидан ҳибсга олинган шахс Эрон тарафдори бўлган «Катаиб Ҳизбуллоҳ» қуролли гуруҳи билан алоқадор. Ушбу гуруҳ олдин ҳам америкаликларни бир неча бор нишонга олганди.

Нашр манбаларидан бири АҚШ ҳукумати яқинда Китлсонни «Катаиб Ҳизбуллоҳ» уни ўғирлаш ёки ўлдириш фитнасини режалаштираётгани ҳақида огоҳлантирган. Ушбу огоҳлантириш у Ироқда репортаж тайёрлаётган вақтда берилган.