АҚШ НАТОдан чиқиши мумкин

Трамп 1 апрел куни Британиянинг The Telegraph газетасига берган интервюсида АҚШ НАТОдан чиқиши масаласини “жиддий кўриб чиқаётганини” айтди. Унинг сўзларига кўра, алянсга аъзо давлатлар АҚШ ва Исроилни Эронга қарши урушда қўллаб-қувватлашдан бош тортган.

Журналистлар билан суҳбатда Трамп НАТОни “қоғоздаги йўлбарс” деб атади.

“Ҳа, мен айтган бўлардимки, бу муҳокама қилинмайдиган масала. НАТО ҳеч қачон мени ҳайратлантирмаган. Мен доимо буни қоғоздаги йўлбарс деб билганман. Айни пайтда, Путин ҳам буни билади”, — деди у.

Трампнинг таъкидлашича, НАТОга аъзо давлатлар Эрон томонидан тўсиб қўйилган Ҳўрмуз бўғозини очиш бўйича операцияда иштирок этишдан бош тортган. Бу бўғоз орқали жаҳон нефтининг тахминан 20 фоизи ташилади.

У иттифоқчиларни танқид қилиб, шундай деди: “Улар у ерда йўқ эди. Бу иш автоматик тарзда амалга ошиши керак эди. Мен савдо қилмаяпман, шунчаки бу табиий равишда бўлиши керак деб ўйлайман”.

Трамп, шунингдек, Украина ҳам мазкур операцияда иштирок этиши керак эди, деб ҳисоблашини айтди: “Украина ҳам у ерда бўлиши керак эди. Бу уларнинг муаммоси эмас, деб ўйлашди. Биз уларга ёрдам бердик, лекин улар бизга ёрдам бермади”, — деди у.

Бундан олдин АҚШ давлат котиби Марко Рубио ҳам Fox News телеканалига берган интервюсида АҚШ НАТО билан муносабатларни қайта кўриб чиқишини айтган.

“Агар НАТО фақат Европа ҳимояси учун керак бўлса, лекин улар бизга керак бўлган пайтда асосий ҳуқуқлардан маҳрум қилса, бу яхши келишув эмас”, — деди у.

Трамп эса Рубионинг бу баёнотларини қўллаб-қувватлашини билдирди.

Интервю давомида Трамп Буюк Британия бош вазири Кир Стармернинг Ҳўрмуз бўғозига ҳарбий кемалар юборишдан бош тортганини танқид қилди.

“Сизларда ҳатто тўлиқ флот ҳам йўқ. Кемаларингиз жуда эски, авиаташувчиларингиз ишламайди”, — деди у.

Шу билан бирга, Британия мудофаа харажатларини ошириш керакми, деган саволга жавоб берар экан, Трамп: “Мен унга нима қилиш кераклигини айтмайман. У ўзи истаган ишни қилади. Бу аҳамиятли эмас”, — деди.

Британия бош вазири Кир Стармер эса Трамп баёнотларига жавобан мамлакат “миллий манфаатларидан келиб чиқиб ҳаракат қилишини” билдирди.

Унинг таъкидлашича, ҳозирги беқарор дунёда Британия учун Европа билан мудофаа, хавфсизлик, энергетика ва иқтисод соҳаларида яқин ҳамкорлик муҳим аҳамиятга эга.