Медиа ҳафталик: сунъий интеллектдан креатив контентгача

Айнан амалий машғулотлар боис, Медиа ҳафталик иштирокчилар учун шунчаки ўқув жараёни эмас, балки медиа фикрлашни қайта шакллантирувчи, касбий дунёқарашни кенгайтирувчи ҳақиқий тажриба мактабига айланди.

Ҳафталикда 60 нафардан ортиқ ахборот хизмати раҳбарлари ва ходимлари, 80 нафардан зиёд телевидение вакиллари, 50 нафардан ортиқ босма ва электрон ОАВ ходимлари иштирок этди. Шу билан бирга, яна шунча мустақил блогерлар ҳам жараёнга жалб қилинди.

Энг катта гуруҳни эса 500 нафардан зиёд мобилограф, SMM мутахассиси ва контент яратувчи ёшлар ташкил этди. Натижада, умумий иштирокчилар сони 700 нафардан ошиб, тадбир ўз кўлами жиҳатидан йирик медиа форум сифатида шаклланди.

Иштирокчилар бешта асосий йўналиш бўйича ўқитилди. Машғулотларда сунъий интеллект, фактчекинг, рақамли этика ва маълумотларни визуаллаштириш бўйича чуқур билимлар берилиб, замонавий медианинг назарий ва амалий асослари уйғунлаштирилди.

Телевидение вакиллари учун репортажларни креатив форматда тайёрлаш, замонавий видеокамераларда сифатли ишлаш ва монтаж усуллари бўйича амалий дарслар ташкил этилди. Бу жараёнлар эфир маҳсулотларига янги нафас бағишлашга хизмат қилади.

Ахборот хизмати ходимлари стратегик коммуникация, кризис ҳолатлардаги ҳаракатлар ва KPI тизимлари бўйича билимларини оширди. Бу уларнинг фақат ахборот тарқатувчи эмас, балки жамоатчилик фикрини шакллантирувчи муҳим субъектга айланишини таъминлайди.

Ҳафталик доирасида 10 000 нафар SMM мутахассисини тайёрлаш лойиҳаси бўйича 7 000 нафардан ортиқ ёшлар қамраб олингани, улардан 2 000 нафари муваффақиятли битиргани қайд этилди. Қорақалпоғистонда эса 500 нафардан зиёд ёшлар ушбу жараёнда иштирок этмоқда.

Маълум қилинишича, мобилография бўйича 1 000 нафар ёшлар, жумладан, Қорақалпоғистонда 175 нафари ўқитилиб, улардан 68 нафари мустақил даромад манбаига эга бўлган, 23 нафари эса иш билан таъминланган.