Ҳегсет: Эрон энди ракета ишлаб чиқара олмайди

АҚШ мудофаа вазири Пит Ҳегсетнинг айтишича, уруш давомида Америка Эроннинг ракета ишлаб чиқариш қувватларини йўқ қилган.

«Биз Эрон мудофаа саноатини тўлиқ йўқ қилишни якунладик, бу бизнинг миссиямиз марказий қисми эди. Улар энди ракета ишлаб чиқара олмайди», — деди Ҳегсет 8 апрел, чоршанба куни Вашингтонда. Унинг сўзларига кўра, Эрон эндиликда бошқа илғор турдаги қуролларни ҳам ишлаб чиқаришга қодир эмас.

Қўшма штаб бошлиқлари қўмитаси раиси Дэн Кейннинг айтишича, Америка ҳарбийлари, агар Трамп шундай буйруқ берса, ўт очишни тўхтатиш тўғрисидаги келишув муддати тугагач, Эронга қарши зарбаларни қайта бошлашга тайёр.

«Аниқ бўлиши учун айтаман: ўт очишни тўхтатиш — бу танаффус, холос, ва қуролли кучлар буйруқ ёки сўров бўлса, сафарбар этилишга тайёрлигича қолади», — деди Кейн.

Ҳегсет ҳам ўз навбатида Америка қўшинлари жанговар шай ҳолатда қолаётганини ва исталган пайтда, қўйилган мақсадлардан қатъи назар, операцияларни қайта бошлаши мумкинлигини таъкидлади.

«Биз ҳеч қаерга кетмаймиз. Биз Эрон ўт очишни тўхтатиш режимига риоя қилаётганини кузатиб турибмиз», — деди у.

7 апрел куни Марказий Европа вақти билан кечқурун АҚШ президенти Доналд Трамп беш ҳафтадан ортиқ давом этган урушдан сўнг Америка «ўзининг барча ҳарбий мақсадларини бажарди ва ҳатто ортиғи билан адо этди», деб баёнот берди. Шу билан бирга, у икки ҳафталик ўт очишни тўхтатиш тўғрисидаги келишув эълон қилинганини маълум қилди. Трамп маълумотига кўра, ушбу келишувга мувофиқ, Эрон стратегик ва иқтисодий жиҳатдан муҳим бўлган Ҳўрмуз бўғозини кема қатнови учун очишга рози бўлган.

Теҳрон эса, ўз навбатида, сулҳни ўз ғалабаси сифатида баҳолади ва Вашингтон Эроннинг Ҳўрмуз бўғози устидан назоратини тан олганини билдирди.

Уруш 28 феврал куни АҚШ ва Исроилнинг Эронга берган зарбалари билан бошланган эди. Бу ҳужумлар оқибатида олий раҳбар Али Хоминаий ҳамда режимнинг яна қарийб 50 нафар юқори лавозимли вакили ҳалок бўлган. Теҳрон бунга жавобан Исроилга, Форс кўрфази давлатларига ва минтақадаги Америка объектларига ракета ҳамда дронлар орқали зарбалар берган.