Apple’да тарихий алмашинув: Тим Кук кетмоқда

1 сентябрдан Apple’нинг янги бош директори Жон Тернус бўлади. Компанияга 15 йил давомида раҳбарлик қилган Тим Кук эса компания директорлар кенгаши раиси лавозимини эгаллайди ва АҚШ ҳукумат органлари билан муносабатларни мувофиқлаштиришда давом этади.

Фото: AP

1 сентябрдан Apple’нинг янги бош директори Жон Тернус бўлади. 2011 йилда Стив Жобс истеъфосидан сўнг компанияга раҳбарлик қилган Тим Кук эса Apple директорлар кенгаши раиси лавозимини эгаллайди. Бу ҳақда мазкур Америка технологик корпорациясининг 21 апрель, сешанбага ўтар кечаси эълон қилинган пресс-релизида айтилган.

Хабарда таъкидланишича, 50 ёшли Жон Тернус 2001 йилдан буён Apple компаниясида ишлаб келади ва ҳозирда компаниянинг аппарат таъминотини ишлаб чиқиш бўйича вице-президенти лавозимида фаолият юритмоқда.

Reuters агентлиги ёзишича, у, хусусан, сўнгги йилларда бозордаги улушини оширган Mac компьютерлари савдосини қайта тиклашда муҳим роль ўйнаган. Bloomberg аввалроқ айнан Тернус Тим Кукнинг эҳтимолий вориси сифатида кўрилаётганини хабар қилган эди.

65 ёшли Тим Кук сўнгги 15 йил давомида Apple’га раҳбарлик қилди ва Apple Watch, AirPod ҳамда Apple Vision Pro каби маҳсулотлар, шунингдек iCloud, Apple Pay, Apple TV ва Apple Music каби сервисларни йўлга қўйди. Bloomberg таъкидлашича, шу давр ичида компания акциялари 20 баробар қимматлашган.

Apple баёнотидан яна маълум бўлишича, Кук компаниянинг давлат билан алоқаларини ҳам мувофиқлаштиришда давом этади. Хусусан, у аллақачон Apple’нинг АҚШ президенти Дональд Трамп билан ўзаро муносабатлари учун масъул ҳисобланади.