Андижонда банк мансабдори 40 минг доллар пора билан ушланди

Маълум қилинишича, республика банкларидан бирининг Андижон вилояти бош бошқармаси бошлиғи ўринбосари кредит таъминоти учун гаровга қўйилган мулкларни сотувга чиқариш ваколатига эга бўлган. У хизмат мавқеидан фойдаланиб, шахсий манфаат йўлида ноқонуний ҳаракатларни амалга оширган.

Аниқланишича, мансабдор шахс Асака туманида жойлашган, умумий баҳоси 16,8 млрд сўм бўлган хусусий даволаш марказининг 4 қаватли биносини аукцион савдосида сотилмай қолганидан фойдаланган. У мазкур мулк нархини 12 млрд сўмга тушириб, банк балансига олиш ҳамда уни маҳаллий тадбиркорга аукционсиз, 7 йил муддатга фоизсиз кредит асосида олиб беришни ваъда қилган.

Бунинг эвазига у тадбиркордан 90 минг АҚШ доллари миқдорида пора талаб қилган.

Давлат хавфсизлик хизмати ходимлари томонидан ўтказилган тезкор тадбир давомида мансабдор шахс 40 минг АҚШ доллари олган вақтида ашёвий далиллар билан ушланган.

Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.

Ҳуқуқни муҳофаза қилувчи органлар фуқароларни шу каби қонунбузилиш ҳолатлари ҳақида тегишли идораларга мурожаат қилишга чақирди. ДХХнинг 1520 қисқа рақами орқали хабар бериш мумкинлиги ва шахс сир сақланиши кафолатланиши таъкидланди.