Ўзбекистонда аёлларга нисбатан эркаклар сони кўпроқ — статистика

Миллий статистика қўмитаси маълумотларига кўра, 2026 йил 1 январь ҳолатида мамлакат бўйича ҳар 1 000 нафар аёлга 1 015 нафар эркак тўғри келган.

Ҳудудлар кесимида бу борада энг юқори кўрсаткич Наманган вилоятида кузатилиб, у ерда ҳар 1 000 нафар аёлга 1 034 нафар эркак тўғри келган.

Шунингдек, юқори кўрсаткичлар Қашқадарё вилоятида — 1 029 нафар, Андижон вилоятида — 1 027 нафар, Навоий вилоятида — 1 026 нафар ва Сурхондарё вилоятида — 1 025 нафарни ташкил этган.

Жиззах ва Фарғона вилоятларида бу кўрсаткич 1 019 нафардан, Самарқанд вилоятида 1 016 нафардан иборат бўлган.

Қорақалпоғистон Республикасида ҳар 1 000 нафар аёлга 1 010 нафар эркак, Сирдарё вилоятида 1 009 нафар, Тошкент вилоятида 1 008 нафар, Бухоро вилоятида 1 006 нафар ва Хоразм вилоятида 1 004 нафар эркак тўғри келган.

Тошкент шаҳри эса рўйхатда энг паст кўрсаткич қайд этилган ҳудуд бўлиб, пойтахтда ҳар 1 000 нафар аёлга 966 нафар эркак тўғри келиши маълум қилинган.