Эпштейн иши бўйича янги қурбонлар кўрсатма бермоқда

Париж прокуратурасига америкалик молиячи Жеффри Эпштейн иши бўйича яна “ўнга яқин” эҳтимолий жабрланувчи мурожаат қилди. Бу ҳақда Париж прокурори Лор Беко RTL телеканали эфирида маълум қилди.

Фото: REUTERS

Унинг сўзларига кўра, ҳозиргача келиб тушган мурожаатлар сони тахминан 20 тага етган.

Терговнинг асосий мақсади Францияда одам савдоси билан боғлиқ эҳтимолий воситачиларни аниқлашдан иборат. Терговчилар Эпштейннинг жиноий фаолиятига ёрдам берган бўлиши мумкин бўлган шахсларни текширмоқда.

“Ҳозирча жавобгарликка тортилиши мумкин бўлган бирор шахс сўроқ қилингани йўқ”, — деди прокурор.

Унинг таъкидлашича, терговнинг ҳозирги босқичида аввало эҳтимолий қурбонларнинг кўрсатмалари йиғилмоқда, шундан кейин ашёвий далиллар ўрганилади.

Кейинги босқичларда Эпштейннинг компьютеридаги маълумотлар, телефон мулоқотлари ва манзил китоблари ҳам экспертизадан ўтказилади.

Америкалик молиячи Жеффри Эпштейн 2008–2009 йилларда фоҳишаликни ташкил қилиш айби билан жазо ўтаган. У 2019 йил 6 июль куни вояга етмаган қизларни фоҳишаликка мажбурлаш айби билан яна ҳибсга олинган ва 10 август куни Нью-Йоркдаги қамоқхона камерасида осилган ҳолда топилган.

2025 йил декабрида Эпштейн ишига оид ҳужжатларнинг биринчи қисми эълон қилинган эди. 2026 йил 30 январда эса АҚШ Адлия вазирлиги “Эпштейн файллари”га оид яна 3 миллиондан ортиқ саҳифа, 2000 та видео ва 180 мингта тасвирни жамоатчиликка тақдим этди.

Аввал эълон қилинган материалларда Британия шаҳзодаси Эндрю каби таниқли шахслар билан алоқалар ҳам тилга олинган. Шунингдек, JPMorgan банки Эпштейн билан узоқ йиллар ҳамкорлик қилгани учун жабрланувчилар билан 290 миллион долларлик келишувга эришган.

АҚШ Адлия вазирлиги маълумотига кўра, иш материалларида 1200 дан ортиқ жабрланувчи аниқланган.