Эпштейннинг ўлимидан олдинги эҳтимолий хати сурати эълон қилинди

АҚШ суди молиячи ва одам савдосида айбланган Жеффри Эпштейннинг 2019 йил июль ойида ўз жонига қасд қилишдан олдин ёзиб қолдирган хатининг фотосуратини эълон қилди. Ҳужжат шу ҳафта The New York Times сўровига кўра ошкор қилинди.

Топилган қоғоз варағида қўлда ёзилган қуйидаги жумлалар бор:

«Бир неча ойлик тергов давомида ҳеч қандай муҳим нарса топилмаганига ишона олмайман. Мен шокдаман».

Матн остида имзо йўқ. Хатни Эпштейннинг камерадоши, собиқ полициячи Николас Тарталионе топиб олган. Ўтказилган хатшунослик экспертизаси молиячининг дастхатига юқори даражада ўхшашликни тасдиқлади.

Воқеалар хронологияси:

2019 йил 23 июль — Эпштейн камерада бўйнидаги жароҳатлар билан ҳушсиз ҳолда топилди. Бу воқеа уни Тарталионе билан бир камерага жойлаштиришганидан бир неча кун кейин содир бўлди.

Воқеадан сўнг, у ўз жонига қасд қилишнинг олдини олиш бўйича махсус протоколга ўтказилган, бироқ кейинчалик яна оддий шароитга қайтарилган.

2019 йил 10 август - Эпштейн Нью-Йоркдаги қамоқхона камерасида ўлик ҳолда топилди. Ўлимнинг расмий сабаби - ўзини осиш орқали ўз жонига қасд қилиш.

Хат биринчи марта 2026 йил 30 апрелда The New York Times газетасида эълон қилинганидан кейин оммага маълум бўлди. Суд журналистларнинг ҳужжатни ошкор қилиш ҳақидаги сўровини қаноатлантирди.

АҚШ Адлия вазирлиги ва қамоқхона вакиллари ҳозирча эълон қилинган хат юзасидан расмий изоҳ бермади.

Бу топилма сўнгги ўн йилликлардаги энг шов-шувли ишлардан бирига яна эътибор қаратди ва Эпштейннинг федерал ҳибсхонадаги шароитлари ҳақида янги саволларни келтириб чиқарди.