Шимолий Корея бир нечта турдаги ракеталарни синовдан ўтказди

Шимолий Корея замонавий жанговар ҳаракатлар учун мўлжалланган тактик баллистик, артиллерия ва юқори аниқликдаги қанотли ракеталарни синовдан ўтказди. Бу ҳақда КХДРнинг КМТА агентлиги маълум қилди.

Фото: REUTERS

Қайд этилишича, ракеталар синови мамлакат раҳбари Ким Чен Ин кузатуви остида ўтказилган. Жанубий Кореянинг Yonhap агентлиги хабарига кўра, бир кун аввал Жанубий Корея ҳарбийлари Шимолий Пхёнан вилоятидаги Чонжу ҳудудидан Сариқ денгиз томон бир нечта қисқа масофали баллистик ва артиллерия ракеталари учирилганини қайд этган.

КМТА маълумотига кўра, 26 май куни ўтказилган синовлар КХДР миллий мудофаа тизимини ривожлантириш бўйича беш йиллик режанинг бир қисми ҳисобланади. Унга кўра, артиллерия ва ракета қўшинларини модернизация қилиш мақсад қилинган.

Ким Чен Ин синов натижаларидан “катта мамнуният” билдирган ва буни мамлакатнинг ҳарбий устунлиги ҳамда жанговар салоҳияти ортиб бораётганининг “яққол сигнали” деб атаган.

Айниқса, у жанубий чегара яқинидаги узоқ масофали артиллерия бўлинмаларига жойлаштирилиши режалаштирилган тактик қанотли ракетани юқори баҳолаган.

Маълум қилинишича, ушбу ракета ер релъефини хариталаш ва сунъий интеллект асосида нишонга йўналтириш каби бир нечта навигация тизимлари билан жиҳозланган. Бу эса унга 100 километр радиусдаги нишонларни юқори аниқлик билан уриш имконини беради.