Шимолий Корея етакчиси Ким Чен Ин қизи Ким Жу Эни ўз вориси қилиш ниятида қатъий ва унинг элита орасидаги мавқейини мустаҳкамлаш учун муайян қадамларни қўймоқда. Бу ҳақда пайшанба куни Жанубий Корея разведкаси вакиллари парламент депутатларига маълум қилди.
Жанубий Корея миллий разведка хизмати (NIS) икки йил олдин ҳам Ким Чен Ин қизини ўзига ўринбосар сифатида тарбиялаётганини тахмин қилганди, аммо энди, депутатлар журналистларга айтишича, у ворисни тарбиялаш босқичидан ворисни тайинлаш босқичига ўтган.
«Ким Жу Э турли тадбирларда иштирок этгани сабабли [...] ва у баъзи давлат масалалари бўйича фикрини билдиргани белгилари қайд этилгани туфайли, NIS уни ворис этиб тайинлаш босқичи бошланган деб ҳисоблайди», – деган журналистларга разведка вакиллари билан ёпиқ учрашувдан кейин депутат Ли Сон Квон.
Депутатларнинг сўзларига кўра, разведка хизмати энди Жу Э Корея меҳнат партиясининг феврал ойи охирида ўтказиладиган қурултойига келиш-келмаслигини, агар келадиган бўлса, қандай мақомда иштирок этишини кузатмоқчи.
Партия қурултойи – Шимолий Кореядаги асосий сиёсий воқеа. Қурултойлар ҳар беш йилда бир марта ўтказилади ва унда раҳбарият яқин йилларга мўлжалланган режаларни, жумладан, ташқи сиёсат, ҳарбий соҳа ва ядро дастурини эълон қилади.
Жу Э – Ким Чен Ин ва унинг рафиқаси Ли Сол Жунинг жамоатчиликка маълум бўлган ягона расмий фарзандидир.
Жанубий Корея разведкаси ҳисоблашича, Кимлар оиласида ундан ёши катта бўлган ўғил фарзанд ҳам бор, аммо бу ҳақда давлат раҳбарининг ўзи ҳам, Шимолий Кореядаги давлат нашрлари ҳам ҳеч қандай маълумот бермаган.
Жу Э борлиги ҳақида ҳам дунё аҳли кутилмаган манбадан хабар топганди: 2013 йилда давлат раҳбари таклифи билан ушбу мамлакатга келган америкалик баскетболчи Деннис Родман Британиянинг Guardian газетасига берган интервюсида «митти қизалоқ Жу Эни қўлда кўтариб кўргани» ҳақида айтганди.
Ҳозирда Жу Э 13 ёшда экани тахмин қилинади. У отасининг фаолияти ҳақидаги телевизион ҳисоботларда илк марта 2022 йилда кўриниш берган – ўша лавҳада Ким Чен Ин ўсмир қизини ёнига олиб, янги қитъалараро баллистик ракетани кўздан кечиришга боргани кўрсатилганди.
Шундан кейин давлат телевидениеси уни тез-тез намойиш эта бошлади. 2025 йил сентябрида у отаси билан биргаликда Хитой тарихидаги энг катта ҳарбий парадни кузатиш учун Пекинга борганди: камералар у Ким Чен Ин билан бирга Пекиндаги вокзалда зирҳланган поезддан чиқаётганини тасвирга олган.
