Суд экспертизасини ўтказишнинг янги тартиби белгиланди

Ўзбекистонда суд экспертизасини ўтказиш тартиби ва муддатларини белгилайдиган янги нормалар жорий этилди. Унга кўра, суд экспертизаси одатда 30 календарь кун ичида ўтказилиши, зарурат туғилганда эса белгиланган тартибда муддати узайтирилиши мумкин.

“Суд-экспертлик фаолияти тўғрисида”ги қонунга мувофиқ, суд экспертизасини тайинлаган орган ёки мансабдор шахс тадқиқотларни ўтказиш ва хулоса тайёрлаш учун суд экспертига зарур бўлган тадқиқот объектлари ҳамда иш материалларини тақдим этади.

Шунингдек, экспертиза учун зарур намуналар суд экспертизасини тайинлаган орган (шахс) томонидан олинади ва процессуал қонунчиликда белгиланган тартибда иш материалларига илова қилинади.

Қонунга кўра, суд экспертизасини ўтказишнинг умумий муддати 30 календар кун этиб белгиланган.

Агар экспертизани мазкур муддатда якунлаш имкони бўлмаса, суд эксперти ёки суд-экспертиза муассасаси муддат тугашига камида 3 иш куни қолганда бу ҳақда экспертизани тайинлаган орган ёки шахсни хабардор қилиши лозим. Шундан сўнг экспертиза муддати томонларнинг келишувига кўра узайтирилиши мумкин.

Тадқиқотлар якунланганидан кейин суд эксперти ёки суд экспертлари комиссияси хулоса тайёрлайди. Комиссия таркибидаги ҳар бир суд эксперти ушбу хулосани шахсан имзолаши шарт.