Эрон Америкага борди, Осиё Европанинг таъзирини бераётир – ЖЧ кундалиги

Шимолий Америкада футбол бўйича 23-жаҳон чемпионати ўйинлари давом этмоқда. Олдинди кундалигимиздан кейин кўп ўйинлар ўтказилди. Муҳожирлар ҳушланмаётган Америкада муҳожирлар фарзанди мезбон жамоага ғалаба келтирди. Осиё жамоалари европаликларнинг тазирини беришда давом этмоқда. Немислар беармон гол урди. Биринчи турда гол урган араб йигит аллақачон Европа топ жамоасига ўтди. Асосий фаворит Испания ва энг диққат марказидаги жамоа Эрон юришини бошламоқда.

Америкада муҳожир қаҳрамон

Биринчи турнинг энг йирик натижаларидан бири Лос Анжелесда қайд этилди. Мезбон Америка Парагвайни 4:1 ҳисобида енгди. Ўйин стартида парагвайлик футболчи ўз дарвозасига гол уриб қўйди. Ўйиннинг охирги сонияларида «Боруссия» Мюнҳенгладбах футболчиси Жованни Рейна яна бир гол урди. Ўйин тақдирини эса амалда биринчи бўлимда Фоларин Балоган томонидан урилган икки гол ҳал қилди. «Арсенал» тарбияланувчиси бўлган бу йигит ҳозирда «Монако»нинг ишонган ҳужумчиси.

Америкада ҳозир муҳожирларга қандай муносабатда бўлишларини биласиз. Ваҳоланки, Америкада туб аҳоли деган тушунчанинг ўзи йўқ, ҳамма қаердандир кўчиб келган. «Коренний» америкаликлар ўлдириб юборилган. Лекин ана шу муҳожирлар давлати Америкада бугун муҳожирлар ҳушланмай қолди, худди шунақа муҳожирлар томонидан.

Америкага ЖЧдек катта мусобақада ғалаба келтирган Фоларин Балоган ҳам нигериялик муҳожирлар фарзанди. Унинг оиласи Лондонда яшаган, бўлажак юлдуз ота-онаси Америкада сафар қилаётган вақтда Ню-Йоркда туғилиб қолган. Шу-шу болакай Америкадан паспортли бўлиб қайтади. Оила кейинчалик Англияда яшашда давом этади, у «Арсенал»да футбол сирларини ўрганади, Англия ёшлар жамоасида ҳам ўйнайди. Лекин инглизларда рақобат катталиги учун Америка миллий жамоаси сафида ўйнашга қарор қилади.

Америкаликларнинг тўртинчи голини урган Жованни Рейна ҳам Англияда туғилган. У келиб чиқиши аргентиналик бўлган Клаудио Рейнанинг ўғли. Рейнада Португалия фуқаролиги ҳам бор. Отаси унга нидерландиялик ажойиб футболчи Жовани ван Бронхорстнинг исмини қўйган. Муҳожирлар ҳушланмай қолган Америкада муҳожирлар фарзандлари гол уриб юргани қандай ажойиб.

Биринчи турнинг кутилмаган натижаларидан бири биз саралашда гуруҳда қолдириб кетган, лекин кейин бир амаллаб ЖЧга чиққан Қатар Европа вакили Швейцариядан очко олгани бўлди. Аввалига Швейцария Эмболонинг голидан кейин олдинга чиқиб олганди, лекин қатарликлар марказий ҳимоячиси Буалем Ҳуки 90+4-дақиқада ҳужумга ўтиб жамоасига дуранг натижани келтирди.

Қатар амири хурсанд бўлиб ҳимоячимизни мукофотланг, деб юборган кўринади, унга 3 миллион доллар ва Rolls Royce Phantom машинаси совға қилингани ҳақида хабарлар чиқди. Қизиғи, ўша гол аслида швейцариялик футболчи номига автогол сифатида ёзилди. Ҳали битта автоголга шунча мукофот. Отабек Шукуровнинг ўйин охирида Мексикага урган голидан урса, ким билади қатарлик футболчи қанақа мукофот оларди.

Бразилия қоқилди

Бразилия биринчи турда Марокашни енга олмаганини кўпчилик сенсация деб атамоқда, лекин мен бунақа демаган бўлардим. Бразилия ҳар қанча кучли бўлмасин, Мағриб охирги йилларда Африканинг энг зўр жамоаси. Таркиб Европада ўйнайдиган топ футболчилардан тузилган. Ўша ўйинда Бразилияга Диаснинг супер узатмасидан кейин гол урган Исмоил Сайбари бугун «Бавария»га ўтгани маълум бўлди. ЖЧ ана шунақа мусобақа, биргина гол сенинг жамоангни ПСВдан «Бавария»га ўзгартириб юбориши мумкин. Бизнинг йигитлар ҳам ана шуни унутмаган ҳолда майдонга тушишлари керак.

Бразилия ва Марокаш гуруҳ фаворитлари деб қаралаётганди, лекин гуруҳдаги иккинчи ўйинда Ҳаитини қийинчилик билан бўлса ҳам мағлуб этган Шотландия ҳозирча биринчи ўринга чиқиб олди. Топингчи шотландларнинг ғалаба голини ким урди? Скотт Мактоминай деб ўйладингиз, лекин у эмас, Че Адамс ҳам эмас, Жон МакГин гол урди. Жон жуда омадли йигит, клубда ҳам ҳеч ким кутмаган жойлардан гол уриб кетади. Бу гал «Астон Вилла» сардорининг зарбаси рикошет билан дарвозага бориб тушди.

Мезбон Америка етакчилик қилаётган «D» гуруҳининг иккинчи ўйинида Австралия кутилмаганда Туркияни мағлуб этди 2:0. Мен турклар биз учун Австралиядан қарор олади деб юргандим, лекин жисмонан жуда кучли кенгурулар Арда ва шерикларига гол уриш имконини беришмади. Бутун ўйин давомида турклар ҳужум қилган бўлиши мумкин, лекин ҳимояда тўғри ўйнаган Австралия иккита вазиятни голга айлантириб ғолиб бўлди.

Мусобақанинг ҳозирча энг йирик натижаси «E» гуруҳида қайд этилди. Германия Кюрасао деган кўпчилик биринчи марта эшитаётган давлар дарвозасига 7 та гол урди. Немислар керак бўлса 17 та ҳам гол урарди, лекин интрига жуда тез ўлди, Германия зерикиб қолди. Маълумот учун айтиб кетай, Кюрасао Нидерландия қироллиги таркибига кирувчи кариб денгизидаги орол давлат. Бу жамоани нидерландиялик машҳур мураббий Дик Адвокат бошқаради. Кечаги ўйиндан кейин 78 ёшли Адвокат ЖЧда ишлаган тарихдаги энг ёши катта мураббийга айланди.

Немислар 7:1 ҳисобида ғалаба қозонганини эшитган бразилияликлар бир хўрсиниб қўйган бўлишса керак. Гуруҳдаги иккинчи ўйинда Кот-д’Ивуар «МЮ» юлдузи Амад Диалонинг голи эвазига Эквадорни мағлуб этди.

Осиё жамоалари европаликлар учун бошоғриқ бўлишда давом этмоқда. Корея ва Австралиядан кейин Япония ҳам европаликларни қийнади. Нидерландия икки марта ҳисобда олдинга чиқиб олди, лекин ҳар сафар японлар жавоб берди. Ҳал қилувчи голни Даичи Камада 88-дақиқада урди. Шу тариқа Япония 2019 йилдан буён Европа жамоаларига мағлуб бўлмаслик сериясини давом эттирди. Бу вақт давомида японлар кўҳна қитъанинг тўртта жаҳон чемпиони бўлган жамоасини мағлуб этишни уддалади.

Шведларни «Брайтон»даги яхши фаолиятидан кейин «Челси» ва «Вест Ҳэм»да ишлари юришмаган Грэм Поттер бошқармоқда. Тунисга қарши ўйинда шведлар жуда тартибли ёрқин ўйин кўрсатди. Бу ўйиндан кейин кўпчилик мухлислар бир нарсани билиб олишди: Александр Исаак ҳалиям футбол ўйнаётган экан. «Ливерпул» тарихидаги ҳозирча энг омадсиз трансферлардан бирига айланган можароли ҳужумчи битта гол урди ва ўйиннинг энг яхши футболчиси бўлди.

Испания ёмон бошлади

Бугун тундан эртага тонггача мундиалда яна тўртта зўр ўйин бўлади. Бу ЖЧ биринчи турининг энг зўр ўйин куни бўлади. Афишалар жуда қизиқали: Испания – Кабо Верде, Белгия – Миср, Саудия – Уругвай, Эрон – Янги Зеландия. Испания кўпчилик томонидан ҳақли тарзда ЖЧнинг асосий фаворити деб қаралмоқда. Чунки амалдаги Европа чемпионлари доим кейинги мундиал фаворити ҳисобланади, бу ёзилмаган қонун. Испания йирик ҳисобда енгиши кутилганди, лекин Ямал ҳам ўйнаган баҳсда Испания дебютант Кабо Вердени мағлуб этолмади.

Эрон Янги Зеландия ўйини ҳам кўпчилик диққат марказида бўлади. Уруш сабаб Эрон мундиалдаги энг кўп кузатилаётган жамоалардан бўлишига шубҳа йўқ. Ўйиндан олдинги матбуот анжуманида ҳам эронлик футболчилардан асосан сиёсий мавзуларни сўрашди. Меҳди Торимий футбол ҳақида сўрамайсизларми, деб хафа ҳам бўлди.

Эронликлар қанақа қийинчилик билан етиб келгани маълум. Улар Америкага ўйин куни бориши, ўйин тугаши билан ортга қайтиши керак. Эронликлар бир неча соат аввал Америкадаги Лос Анжелес аэропортига бориб қўнди. Уларнинг жиддий қўриқлаб меҳмонхонага олиб боришган. Меҳмонхона ҳам табиийки полиция томонидан ноодатий тарзда қаттиқ қўриқланади. Шу тариқа ЖЧ тарихида илк марта уруш ҳолатидаги мамлакат жамоаси мундиалга, бунинг устига душман давлат юртига футбол ўйнаш учун борди. Футбол тинчлик элчиси эканига бундан ортиқ исботни қидириб ҳам ўтирманг...