Мундиалда 4-кун. Кюрасаонинг тарихий голи, Умар Артанга компенсация ва Англиянинг саргузаштлари

Жаҳон чемпионатида 15 июнга ўтар кечаси яна иккита гуруҳда 4 та учрашув бўлиб ўтди. Германия камтарона Кюрасаони йирик ҳисобда тор-мор этди, нидерландлар японлар билан ўйинда очко йўқотди, Кот-д'Ивуар турнирни Эквадорга қарши ўйиндаги минимал ҳисобдаги ғалаба билан бошлади, Тунис эса шведларга ортиқча муаммо туғдира олмади. Майдон ташқарисида ҳам қизиқарли воқеалар содир бўлди.

Германия – Кюрасао 7:1
Голлар: Нмеча, 6 (1:0). Комененсия, 21 (1:1). Шлоттербек, 38 (2:1). Ҳаверц, 45+5 - пеналти (3:1). Мусиала, 47 (4:1). Браун, 68 (5:1). Дениз Ундав, 78 (6:1). Ҳаверц, 88 (7:1)
Германия: Нойер, Та (Рюдигер, 73), Шлоттербек, Браун (Раум, 73), Киммиҳ (Антон, 83), Павлович, Нмеча (Горецка, 73), Мусиала (Дениз Ундав, 64), Вирц, Сане, Ҳаверц
Кюрасао: Ром, Обиспо, Базур, Фонвилл, Флоранус, Л. Бакуна, Ж. Бакуна, Комененсия, Чонг (Кастанер, 83), Локадиа (Маргарита, 65), Ҳансен (Антониссе, 46)

Турнирга илк марта ташриф буюрган кюрасаоликлар кутилганидек тезкор гол ўтказиб юборишди, аммо 21-дақиқада кутилмаганда ҳисоб тенглаштирилди. 22 ёшли ҳимоячи Ливано Комененсияга жамоанинг мундиалдаги илк голини уриш насиб этди.

Лекин оролликлар жамоаси қувончи узоққа чўзилмади. Ўйиннинг қолган 70 дақиқасида немислар яна олтита гол уришди ва турнирнинг ҳозирча энг йирик натижасини қайд этишди – 7:1.

«Биз Германияга қарши ўйинда бундай ҳолат бўлиши мумкинлигини билардик. Бундан қочиб бўлмайди. Жамоадагиларнинг барчаси учун катта сабоқ бўлди. Ва биз бундан мутлақо уялмаймиз», – деди ўйиндан кейин Кюрасао бош мураббийи Дик Адвокат.

Ушбу нидерландиялик ЖЧ тарихидаги энг кекса ёшли (78) мураббийга айланди. Шу куни рақиб жамоасини майдонга бошлаб келган 39 ёшли Юлиан Нагелсманн эса Дик профессионал фаолиятини бошлаганида ҳали туғилмаганди. Ушбу мураббийлар орасидаги ёш фарқи ҳам турнир тарихидан рекорд кўрсаткич сифатида ўрин олди – 39 йил-у 229 кун.

Нидерландия – Япония 2:2
Голлар: ван Дейк, 51 (1:0). Накамура, 57 (1:1). Саммервилл, 64 (2:1). Камада, 88 (2:2)
Нидерландия: Вербрюгген, ван Дейк, ван Хекке, ван де Вен, Думфрис, де Йонг, Рейндерс (Копмейнерс, 70), Гравенберҳ (Аке, 81), Гакпо (Бробби, 85), Саммервилл (Тимбер, 70), Мален (Депай, 70)
Япония: Судзуки, Танигути, Х. Ито, Ватанабе (Сугавара, 75), Камада, Сано, Накамура, Доан (Томиясу, 75), Кубо (Огава, 75), Маэда (Д. Ито, 66), Уэда (Сиогаи, 84)
Огоҳлантиришлар: Саммервилл, 61. Депай, 83. ван де Вен, 90

Нидерландлар ва японлар Германия ва Кюрасао каби очиқ футбол намойиш этишмади, аммо бу ўйинда ҳам ўзига хос драма бор эди. Лекин биринчи бўлим очиқчасига зерикарли кечди: бўлимдаги энг қизиқ кадр трибунада ухлаётган чақалоқ кадри бўлди.

Жамоалар биринчи бўлим учун компенсация сифатида иккинчи бўлимни ўта ҳужумкор ўтказишди. 51-дақиқада нидерландлар сардори Виржийл ван Дейк бош билан гол уриб ҳисобни очди, 6 дақиқа ўтиб Кейто Накамура мувозанатни тиклади. 67-дақиқада эса европаликлар Крисенсио Саммервиллнинг саъй-ҳаракатлари эвазига яна ҳисобда олдинга чиқиб олишди.

Шундан кейин ўйинда бироз сокинлик кузатилди ва Роналд Куман шогирдлари ҳисобни ушлаб қолиш учун ўйнай бошлади. Аммо Японияда охирги штурм учун куч топилди: 89-дақиқада Даити Камада ҳисобни тенглаштирувчи голни урди – 2:2. Самурайлар мундиалларда европаликларга ютқазмасликни яна бир бор уддалашди – бу серия 2018 йилдан буён давом этиб келмоқда.

Кот-д’Ивуар – Эквадор 1:0
Гол: Диалло, 90 (1:0)
Кот-д’Ивуар: Я. Фофана, Синго, Агбаду, Конан, Дуэ (Коссуну, 89), С. Фофана (Оулаи, 77), Кессе, Туре (Бонни, 56), Диоманде, Ваи (Диалло, 56), Пепе (Сангаре, 77)
Эквадор: Галиндес, Ордонес, Пачо, Инкапие, Франко (Пресиадо, 62), Вите, Кайседо, Минда (Ангуло, 56), Йебоа (Поросо, 62), Валенсия (Родригес, 77), Плата
Огоҳлантиришлар: С. Фофана, 28. Кессе, 38. Дуэ, 40 – Поросо, 73

Бу ўйинда голлар шоуси бўлмаслиги олдиндан маълум эди. Икки жамоа ҳам жаҳон чемпионатига кучли ҳимоя чизиғи билан етиб келган, африкаликлар саралаш босқичида бирорта гол ўтказмаган (25:0), эквадорликлар ҳам ўз минтақасида энг кам гол ўтказган (5) жамоа бўлганди. Аммо бу жамоаларнинг ўйинини ҳимоявий ва зерикарли ўтди деб бўлмайди.

Биринчи бўлимда жанубий америкаликлар ташаббусга эгалик қилишди – ўйин дебютидаёқ ҳисоб очилиши мумкин эди, аммо жамоа ҳужумчиси Эннер Валенсиянинг жарима майдони марказидан йўллаган зарбаси тўсин юқорисидан ўтиб кетди. Кейин эса эквадорликларнинг икки зарбасидан кейин тўп дарвоза устунига ва тўсинга борди: аввалига Жон Йебоа ўз имкониятидан фойдалана олмади, бироз ўтиб Алан Минда қулай позицияда туриб тепган тўп тўсинни титратди. Кот-д'Ивуар ўз қарши ҳужумлари билан жавоб қайтарди, аммо бу ҳужумлар голли вазиятларга айланмади.

Танаффусдан кейин эса ташаббус африкаликлар қўлига ўтди. Ва энди дарвоза устунини пойлаш навбати уларга келди – ивуарликлар форварди Эле Ваига аниқлик етишмади. Кот-д'Ивуар босимни кучайтиришда давом этди ва кетма-кет ҳужумлар охири гол билан якунланди – ўйиндаги ягона гол 90-дақиқада қанотдан амалга оширилган тезкор ҳужум орқали урилди: Вилфрид Синго тўпни жарима майдони яқинига етказиб берди, тўпга етиб келган Амад Диалло бурчак томон аниқ зарба йўллади – 1:0.

Швеция – Тунис 5:1
Голлар: Айяри, 7 (1:0). Исак, 30 (2:0). Рекик, 43 (2:1). Йокереш, 59 (3:1). Сванберг, 84 (4:1). Айяри, 90+6 (5:1)
Швеция: Нордфелдт, Ҳин, Линделёф, Лагербилке, Челстрем (Сванберг, 84), Нюгрен (Бергвалл, 64), Айяри, Гудмундссон (Строуд, 64), Бернҳардссон (Свенссон, 90), Исак (Эланга, 90), Йокереш
Тунис: Шамаҳ, Талби, Рекик, Бен Амида, Абди, Валери (Маҳмуд, 72), Сҳири (Ашури, 72), Межбри, Ҳедира (Гарби, 84), Саад (Тунекти, 72), Слимане (Шауат, 84)
Огоҳлантириш: Хедира, 54

Шведлар жаҳон чемпионатига саралаш босқичини ўта муваффақиятсиз ўтказиб, ўз гуруҳида сўнгги ўринда қолганди ва фақат қўшимча имконият орқали турнирга йўлланма олганди. Жамоа Миллатлар лигасидаги рейтинги эвазига ўтиш босқичида иштирок этиш имкониятини қўлга киритиб, плей-офф яримфиналида Украинани (3:1), финалда Полшани (3:2) мағлуб этди. Грэм Поттер шогирдлари бунинг учун қаттиқ танқидга учраганди ва шу туфайли турнир финал босқичини кучли бошлаш талаб этиларди.

Ва скандинавларда барчаси ўхшади. Ўйинда ҳисоб 7-дақиқадаёқ очилди – Ёсин Айяри қайтган тўпни дарвоза тўрига киритиб юборди. У ўз отаси туғилган мамлакат дарвозасига урган голини нишонламасликни маъқул кўрди. 30-дақиқада эса шведлар ҳисобдаги устунликни оширишди – «Арсенал» форварди Виктор Йокереш «Ливерпул» форварди Александр Исакни голли узатма билан таъминлади. Аммо бўлим охирида Шимолий Африка вакиллари Умар Рекикнинг голи эвазига ҳисобни қисқартиришди. Аммо бу гол тунисликлар учун ўйинда ягона гол бўлиб қолди.

Танаффусдан кейин улар яна уч гол ўтказиб юборишди: аввалига Исак қулай вазиятда турган шеригини тўп билан таъминлаб, Йокерешга қарзини қайтарди, кейинн яримҳимоячи Маттиас Сванберг ҳисобни йириклаштирди, Айяри эса ўйинга қўшиб берилган дақиқаларда дублни расмийлаштирди – 5:1. Бу ғалаба скандинавларни F гуруҳида биринчи ўринга олиб чиқди.

Умар Артаннинг кўнглини олишмоқда

Навбатдаги кун ва Умар Артанга компенсация ҳақида навбатдаги хабар. Африканинг 2025 йилдаги энг яхши рефериси, ФИФА томонидан 2026 йилги жаҳон чемпионати учун чақирилган ушбу сомалилик ҳакам ҳеч қандай изоҳсиз Қўшма Штатларга киритилмаганди. Унинг визаси борлиги ва барча ҳужжатлари жойида экани ҳам наф бермаганди – кейинроқ америкалик расмийлар уни террорчилар билан алоқаларда гумон қилишгани маълум бўлди.

Шундан кейин Умарни ватанида қаҳрамонлардек қаршилашди: уни катта стадионга чақириб олқишлашди ва қўлларида кўтаришди. Кейинроқ УЕФА сомалилик ҳакам учун истисно қилиб, «ПСЖ» ва «Астон Вилла» ўртасида 12 август куни ўтказиладиган Суперкубок баҳсини бошқариш учун уни тайинлашди.

Энди эса BBC Артанга ЖЧдаги иши учун белгиланган иш ҳақи тўлиқ тўлаб берилишини хабар қилди. Бу маблағ миқдори аниқ эмас, аммо ҳисоб-китобларга кўра, асосий гонорар 100 минг долларгача етади. Афтидан, Умар турнирни ўтказиб юбораётганидан унчалик қаттиқ хафа бўлмайди.

Инглизларни омадсизлик таъқиб этмоқда

Англия миллий жамоасининг океанортидаги саргузаштлари давом этмоқда. Турнир бошланишидан олдин «Уч шерлар» жамоасининг Канзас-Ситидаги базаси яқинида отишма рўй бериб, тўққиз киши жабрланди, шундан кейин Флоридада футболчилар 6,1 магнитудали зилзилани бошдан кечиришди (бу ҳудудда 150 йилдан буён бу қадар кучли силкиниш бўлмаганди), кейин эса Коста-Рикага қарши ўртоқлик учрашуви ноқулай об-ҳаво шароити туфайли кейинга қолдирилди. Кейин Томас Тухел жамоаси базасига ўғри тушиб, машғулотларда ишлатиладиган буюмларни, бир неча футболкани ва бошқа сувенирларни ўғирлаб кетишди.

Энди эса навбатдаги бало: табиий офат. The Athletic хабарига кўра, 14 июн куни инглизлар жамоаси футболчиларига торнадо яқинлашаётгани ва ойнаси йўқ бинода қолиш тавсия этилиши ҳақида смс юборилган. Якунда Канзас-Ситида вайронгарчиликлар қайд этилган, аммо жамоа яшаётган база шикастланмаган.

Мураббийлар ўйиндаги паузаларни танқид қилмоқда

2026 йилги жаҳон чемпионатида киритилган янгиликлардан бири – ўйин давомида футболчилар сув ичиб олиши учун икки марта танаффус берилиши билан боғлиқ. Америкадаги спорт турларида азалдан мавжуд бўлган ушбу қоида европалик мураббийларга маъқул келмаяпти. Хусусан, Швеция устози Грэм Поттер бундай танаффуслар ўйинга халал беришини қайд этди.

«Ҳозирдан айтиш мумкинки, улар динамикани ўзгартиради, чунки икки бўлим ўрнига ўйин чоракларга бўлинади. Агар жамоа устунликка эга бўлиб турган бўлса, танаффусдан кейин уни бой бериши мумкин. Мен шикоят қилмайман. Биз бунга мослашишимиз керак», – деган Поттер.

АҚШ миллий жамоаси бош мураббийи Маурисио Почеттинога ҳам бу янгилик ёқмаган. «Бу менга ёқмаяпти. Мен бундай танаффусларни фақат чинакамига экстремал шароитларда ўйналганида қўллаб-қувватлайман. Аммо об-ҳаво яхши бўлса, уларга ҳожат йўқ», – деб ҳисоблайди «Тоттенҳэм»нинг собиқ устози.

Шу билан бирга, айрим манбаларга кўра, футболчилар сув ичиб олиши учун қилинаётган танаффуслардан мақсад – реклама. Журналист Ромен Молинанинг ёзишича, Мексика ва ЖАР ўртасидаги ўйинда (2:0) арбитр ТВдаги реклама тугамагунича ўйинни бошламай турган.

Португаллар Жотани хотирлайди

Португалия миллий жамоаси таъсирли акцияга тайёргарлик кўрмоқда – футболчилар бутун турнир давомида ўйинларга жамоанинг ўтган йил ёзида вафот этган ҳужумчиси Диогу Жотани эслатиб турувчи билагузуклар билан чиқишади. Бу ҳақда матбуот анжуманида Витиня айтиб берди.

«Уларни бизга бош вазир Луис Монтенегро совға қилди. Уларда бизнинг исмларимиз, шунингдек, Диогу исми ҳам бор. Бош вазир бизга билагузук тақишга рухсат берилгани, лекин буни қилиш шарт эмаслигини таъкидлади. Биз совғани катта иштиёқ билан қабул қилдик ва бутун турнир давомида ушбу билагузукларда чиқиш қилмоқчимиз», – деган Витиня.

Эслатиб ўтамиз, Жота ва унинг укаси Андре Тейшейра да Силва 2025 йил 3 июлда Испания шимоли-ғарбида автоҳалокат оқибатида ҳалок бўлишганди. У олдинги жаҳон чемпионатида якуний таркибга кира олмаганди.

15-16 июн кунги ўйинлар тақвими

21:00. Испания – Кабо-Верде

00:00. Белгия – Миср

03:00. Саудия Арабистони – Уругвай

06:00. Эрон – Янги Зеландия