Россияда Ту-22М3 бомбардимончиси ҳалокатга учради

Экипаж катапульта қилган, учувчиларнинг ҳаёти ва соғлиғига ҳеч қандай хавф йўқ.

Фото: Видеодан кадр

Ту-22М3 самолёти Иркутск вилоятида қўниш пайтида ҳалокатга учради, деб хабар берди Россия Мудофаа вазирлиги.

Вазирлик маълумотларига кўра, бомбардимончи самолёт режали ўқув-машғулот парвозини амалга оширган. Экипаж катапульта қилган, учувчиларнинг ҳаёти ва соғлиғига ҳеч қандай хавф йўқ.

Россия Мудофаа вазирлигининг таъкидлашича, самолёт ўқ-дорилар тўпламисиз парвоз қилган. Гувоҳларнинг айтишича, самолёт Свирск шаҳри яқинида қулаган.

Ту-22М3 — узоқ масофали товушдан тез учувчи бомбардимончи ракета ташувчи самолёти, унинг қиймати тахминан 100 миллион доллар. Бу самолётлар Россия Ҳаво-космик кучларининг узоқ масофали авиацияси таркибига киради. Узоқ масофали авиация самолётлари Россия ядровий триадасининг таркибий қисмларидан бири ҳисобланади, бироқ улар оддий ракета-бомба қуроллари, жумладан, қанотли ракеталар билан ҳам зарба бериши мумкин.

Ту-22М3 самолётлари 2025 йил апрель ойида Иркутск вилоятининг Усолск туманида, 2024 йил август ойида эса Иркутск вилоятининг Черемхов туманида ҳалокатга учраган эди.