0:5. Бу нима эди? | ЖЧ кундалиги

Мундиалнинг иккинчи турига келиб, афсуски, биз қўрққан воқеа содир бўлди. Ўзбекистон Португалия билан ўйинда бардош беролмади, Роналду ва шериклари бешта гол уриб, бизни йирик ҳисобда мағлуб этишди. Лекин тонгда қадрдонимиз Колумбия Конгони ҳам енгиб, бизга яна бир имкон берди.

Жуда кучли рақиб

Португалия билан биринчи турда ўйнаганимизда, бунақа йирик ҳисобда енгилмасдик деб ўйлайман. Чунки Роналду жамоаси биринчи турга қандай чоғланиш билан тушганини кўрдингиз. Конго билан дурангдан кейин улар манзилига танқидлар ёғилди, етмаганига жамоа ичидаги интригалар ҳақида миш-мишлар тарқалиб, португалларни руҳлантириб юборди.

Мусобақага асосий фаворитлардан бири сифатида келган жамоа биринчи турдаги муваффақиятсизликдан кейин ҳаммага зўр эканини исботлаш учун алам билан майдонга тушди. Ва тиш-тирноғигача қуролланган ҳарбийларга тўла танк олдидан биз чиқиб қолдик. Бошқа жамоа бўлса ҳам, бардош беролмасди, ишонаверинг. Чунки рақибда чоғланиш жуда кучли эди.

Португалиянинг ўйинларини узоқ йиллардан бери бетараф мухлис сифатида кўриб, завқланардик, лекин кеча бу жамоа кучини яқиндан кўрдик. Ўзбекистоннинг ўйинини бошқача диққат билан томоша қиламиз ахир. Рақибнинг барча чизиқлари кучли эканини ўз танамизда ҳис қилдик. Бруну Фернандеш деган дунё футболининг энг зўр плеймейкери биргина узатма билан 41 ёшли ҳужумчини яккама-якка вазиятга олиб чиқишини ҳам кўрдик.

Рақиб бизга қарши ўйинга шунақа зўр тайёрланган эканки, ўз услубида ўйнаш камлик қилади деб ўйлаб, стандартларга ҳам жиддий эътибор қаратди. Иккинчи голда ҳамма Роналду тепишини кутди, лекин Мендеш гол урди. Аслида у ҳимоячи бўлса ҳам, зарбаси жуда зўр, стандартларни яхши амалга оширади. Интернетда Нуну тепган пеналтиларни кўриб чиқинг, менимча, хато қилганини тополмайсиз.

Тўртинчи голни португаллар машғулотларда тайёрланган бурчак зарбасидан кейин уришди. Рақибини кучсиз демай, стандартларга ҳам алоҳида тайёрланган жамоа, шубҳасиз, ғалабага муносибдир. Тан олайлик, Португалия дунёнинг энг кучли жамоаларидан бири эканини исботлади.

Ҳусановнинг кўз ёшлари...

Албатта, ўйинда кўп хато қилдик, ҳамма голда кимдир хато қилади, аммо мен бу ҳақда гапирмоқчи эмасман. Биз бу ўйинда ҳеч қандай машғулотлар, ҳеч қайси хорижий йиғинлар беролмайдиган тажриба орттирдик. Осиё грандларига қарши ўйинларда ҳам мана шунақа довдирардик. Ишонинг, энди Осиёнинг ҳеч бир жамоасига қарши оёғимиз қалтирамайди! Чунки биз ўйнаш мумкин бўлган энг кучли рақибга қарши ўйнаб бўлдик, бундан зўри бўлмайди.

Январда Саудия Арабистонида Осиё чемпионати бошланади. Ўша мусобақада буткул бошқача, руҳан ўсган, ҳеч кимдан қўрқмайдиган Ўзбекистонни кўришимизга ишонаман. Криштиану ва жамоасига шунчаки тан бериш керак. Улар бизни тезда унутиб юборишар, лекин биз Португалиядан олган катта дарсимизни асло унутмаймиз. Азизнинг бекор қилинган голини, Элдорнинг танасида бор кучини сарфлаб югурганини, Жалол Жайид деган ҳуштагига «ёпишиб олган» марокашлик ҳакамни, футболимиз юлдузи Абдуқодир Ҳусановнинг кўз ёшларини унутмаймиз. Мен бу жамоа билан яна бир марта ўйнашимизни жуда хоҳлардим.

Футболчиларимиз ўйиндан кейин йиғлашди, чунки улар ўйинга бутун миллат кўз тикиб турганини биларди. Рақиб Португалия, нима қилайлик, деб бир амаллаб ўйинни тугатиб, кейин Роналду билан расм тушишга ошиқишмади. Ютқазиб қўйишганидан уялишди. Лекин сиз уяладиган иш қилмадингиз, йигитлар. Шарафли, лекин машаққатли йўлни бошлаб бердингиз. Бунақа йўлларда ҳаммаси силлиқ кечмайди. Рақиб «Реал», «Барселона», ПСЖ юлдузларидан ташкил топганди. Бизда унақа имкон йўқ, таркибимиз ўзимизга яраша, асосий муаммоси футболчиларга маош тўлаш бўлиб қолган маҳаллий чемпионатдан футболчи олишга мажбурмиз. Лекин ҳозирча. Бу мундиалдан кейин яна бир қатор футболчиларимиз учун Европа эшиклари очилишига умид қиламиз.

Колумбия ёрдам қилди

Match day’нинг охирги ўйинида Колумбия Конгони 1:0 ҳисобида енгиб муддатидан аввал плей-офф масаласини ҳал қилди. Диас жамоаси бу ғалаба орқали бизга ёрдам бериб юборди. Энди Ўзбекистон охирги турда Конгони енгса, плей-оффга чиқиши мумкин. Албатта, бу ўз қўлимизда эмас, бошқа ўйинларни ҳам кутишга мажбурмиз, лекин барибир учинчи ўйинда ҳам имкониятни сақлаб қолганимиз жуда зўр бўлди.

Кеча тунда яна икки ўйин ўтказилди. Бизнинг ўйиндан кейин Англия Карлуш Кейруш бошчилигидаги Ганани енга олмади — 0:0. Бу дурангдан кейин Гана гуруҳдан чиқиш масаласини ҳал қилди. Англия ҳам гуруҳда қолиб кетмаслиги аниқ. Гуруҳдаги яна бир ўйинда Хорватия Панамани мағлуб этди. Бу гуруҳдан катта эҳтимол уч жамоа плей-оффга чиқади. Бугундан жаҳон чемпионатида 3-тур ўйинлари бошланади.