Қўшимча функционаллар
-
Тунги кўриниш
Коррупцияга қарши ички назоратчиларнинг хавфсизлиги кафолатланди
Давлат органлари ва ташкилотларининг комплаенс ва коррупцияга қарши ички назорат тузилмаларида ишловчи ходимлар учун қонун даражасидаги ҳимоя механизмлари белгиланди. Уларнинг автомобили, хизмат хонаси ва яшаш жойига кириш ёки тинтув ўтказиш, шунингдек телефондаги сўзлашувларини эшитиш учун Бош прокурорнинг рухсати бўлиши шарт. Уларга нисбатан фақат Бош прокурор жиноят иши қўзғата олади.
Ўзбекистон президенти 22 июн куни имзолаган қонун билан, “Коррупцияга қарши курашиш тўғрисида”ги қонунга янги модда қўшилди.
Бу модда – давлат органлари ва ташкилотлари комплаенс ва коррупцияга қарши ички назорат тузилмалари ходимларининг хавфсизлик кафолатлари ҳақида.
Белгиланишича, давлат органлари ва ташкилотларининг комплаенс ва коррупцияга қарши ички назорат тузилмалари ходимлари давлат ҳимоясидадир.
Давлат органлари ва ташкилотларининг комплаенс ва коррупцияга қарши ички назорат тузилмалари ходимларининг турар жойига ёки хизмат хонасига, фойдаланадиган транспортига кириш, уларни кўздан кечириш, уларда тинтув ўтказиш ёки улардан ашёни олиш, уларнинг телефондаги сўзлашувларини эшитиш, ходимларни кўздан кечириш ва уларни шахсий тинтув қилиш, шунингдек уларнинг хат-хабарларини, уларга тегишли ашёлар ва ҳужжатларни кўздан кечириш, олиб қўйиш ёхуд олиш фақат Ўзбекистон Республикаси Бош прокурорининг ёзма рухсати билан, белгиланган тартибда амалга оширилиши мумкин.
Давлат органлари ва ташкилотларининг комплаенс ва коррупцияга қарши ички назорат тузилмалари ходимини, шу жумладан у билан меҳнат шартномаси тугатилганидан ёки хизматдан бўшатилганидан кейин икки йил ичида собиқ ходимини гувоҳ ёки гумон қилинувчи сифатида сўроқ қилишга, уларга нисбатан қамоққа олиш тарзидаги эҳтиёт чорасини қўллашга ва ушлаб туришга Ўзбекистон Республикаси Бош прокурори хабардор этилган ҳолда, белгиланган тартибда йўл қўйилади.
Давлат органлари ва ташкилотларининг комплаенс ва коррупцияга қарши ички назорат тузилмалари ходимларига нисбатан жиноят иши фақат Ўзбекистон Республикаси Бош прокурори томонидан қўзғатилиши мумкин.
Давлат органлари ва ташкилотларининг комплаенс ва коррупцияга қарши ички назорат тузилмалари ходимлари қонунчиликда белгиланган тартибда ҳуқуқий ва ижтимоий жиҳатдан ҳимоя қилинади.
Қонун расмий эълон қилинган кун – 2026 йил 23 июндан кучга кирди.
Эслатиб ўтамиз, 2025 йил охирида имзоланган президент фармони билан, коррупцияга қарши курашиш сиёсатида давлат органлари ва ташкилотларидаги ички назорат бўлинмаларига алоҳида урғу қаратилган эди. Фармонга кўра:
- бу бўлинмаларнинг фаолияти Коррупцияга қарши курашиш агентлиги билан узвий ҳамкорликда ташкил этилади;
- бу бўлинмаларнинг раҳбарлари ва ходимлари фаолиятига самарадорлик кўрсаткичлари (KPI) қўлланилмайди, уларга KPI'га боғланган устамалар максимал миқдорда тўланади;
- уларни интизомий жавобгарликка тортиш учун Агентликнинг розилиги керак бўлади.
Агар Агентлик бирор бир ташкилотда коррупция хавфи юқори деб ҳисобласа, ўша ташкилотдаги коррупцияга қарши ички назорат бўлинмасини кенгайтириб, қўшимча ходимлар қўшиши мумкин. Қўшимча ходимларни лавозимга тайинлаш ва лавозимдан озод қилиш Агентлик директорининг буйруғи билан амалга оширилади.
