ЖЧ-2026 анонси. Мбаппе ва Ҳоланд плей-оффда старт олади

30 июн куни кечқурун ва 1 июл тонгида жаҳон чемпионати 1/16 босқичи доирасида Кот-д'Ивуар – Норвегия, Франция – Швеция ҳамда Мексика – Эквадор жуфтликлари иштирокидаги ўйинлар бўлиб ўтади.

Кот-д'Ивуар – Норвегия
30 июн, 22:00. AT&T Stadium, Арлингтон

Бу жамоалар ўйинида кураш, ҳужумлар ва голлар кўп бўлишини тахмин қилиш мумкин. Скандинавлар жамоаси устози Столе Солбаккен Кот-д'Ивуар – бу сафарги жаҳон чемпионатининг жисмоний жиҳатдан энг кучли жамоаларидан бири эканини эътироф этди. У билан баҳслашиш қийин, африкаликларда кучли ҳимоя чизиғи, Пепе, Диалло ва Диоманде қиёфасида кучл қанотлар мавжуд. Фил суяги қирғоғи жамоаси гуруҳ босқичида Эквадор ва Германия билан ўйинларда тенг кураш таклиф этиб, бу ўйинларда 4 очко олди, Кюрасаога қарши ўйинда эса ортиқча куч сарфламасдан ғалаба қозонди ва ўз тарихида илк бор плей-оффга чиқди. Айнан ушбу жамоа турнир кашфиётига айланиши мумкин.

Аммо Солбаккен айнан плей-оффнинг биринчи ўйинига куч тежаш учун гуруҳ босқичининг сўнгги турида  Францияга қарши кечган баҳс учун иккинчи таркибни ташлади ва Норвегиянинг асосий таркиби аъзолари жисмоний тайёргарлик борасида рақибдан ортда қолмаслиги тайин. Жамоа ҳужум чизиғи вакиллари – Ҳоланд ва Нуса тезкор қарши ҳужумларда фойдаланишга тайёр туради. Қолаверса, норвеглар жамоасида бир-бирини тушуниб ўйнашда муаммо йўқ, жамоа сардори Эдегорнинг ностандарт қарорлари эса ўйин тақдирини ҳал қилиши мумкин. Бундан ташқари, скандинавлар турнир давомида ўзини жуда камтарона тутмоқда – Сенегал билан ўйинда плей-офф масаласи муддатидан олдин ҳал қилинганидан кейин Ҳоланд футболчилар ўзидан фаворит ясаб олмаслиги кераклигини айтганди.

Умуман, бу оқшом икки жамоадан бирининг ғалабаси сенсация сифатида баҳоланмайди, бу жамоалардан бири кейинги босқичда Бразилия билан ўйинда сенсация қилиши мумкин.

Франция – Швеция
02 июл, 02:00. New York/New Jersey Stadium, Ню Йорк

Швеция гуруҳни барқарор ўтказа олмади ва иккинчи турда Нидерландия билан ўйинда оғриқли мағлубиятни қабул қилиб олди (1:5). Грэм Поттер ушбу ўйинда нидерландларнинг қанотларига бўш ҳудудлар тақдим этиб, тактик жиҳатдан муваффақиятсизликка учради. Кучли вингерларга эга бўлган Франция билан бундай хатони такрорлаш ҳалокатли тус олиши тайин. Қолаверса, жамоанинг асосий ҳимоячиларидан бири Хиен жиддий жароҳат олди ва бу скандинавлар жамоаси учун жуда ёмон хабар. Бошқа томондан, шведлар ҳимоя чизиғини юқори ўрнатадиган французларни қарши ҳужумларда жазолаши мумкин, буни гуруҳнинг биринчи турида Сенегал кўрсатиб берганди. Швециянинг ҳужумдаги асосий қуроллари Йокереш, Эланга ва Исак тезкор футболчилар бўлиб, ҳимоячилар ортига очилишни жуда яхши уддалашади.

Шунинг учун Франция бош мураббийи Диде Дешам Салиба тезроқ тикланишини, Рабио, Коне ва Тчуамени (улардан икки нафари бошланғич таркибга кириши аниқ) каби яримҳимоячилар майдон марказида ишончли ўйнашидан умид қилади. Унинг асосий кузири эса – ҳужум чизиғидир. Мбаппе ва Дембеле ажойиб спорт формасида, Олисе ҳам ўйиндан ўйинга очилиб бормоқда. Уч ранглилар жамоасида гол уришда муаммо бўлмаслиги тайин, аммо ҳимоя чизиғига саволлар сақланиб қолмоқда.

Французлар қийин сеткага тушганди, лекин бу томондаги Германия ва Нидерландия аллақачон турнирни тарк этди, энди жамоа нимчоракфиналга чиқса, Парагвай билан ўйнайди, чоракфиналдаги эҳтимолий рақиб Марокаш ва Канададан бири бўлади, агар яримфиналгача етиб борилса – Португалия, Испания ёки Белгиядан бири тўғри келиши мумкин.

Мексика – Эквадор
1 июл, 06:00. Estadio Azteca, Мехико

Мексикаликлар A гуруҳини идеал кўрсаткичлар билан якунлашди: 3 ўйинда 9 очко ва бирорта гол ўтказиб юборилмади. Аммо жамоа бош мураббийи Ҳавиер Агирре шундай муваффақиятли стартдан кейин ҳам ўйин сифатидан норози ва кучни 90 дақиқага тақсимлашда муаммолар кузатилаётганини айтмоқда. Шу билан бирга, турнир мезбонлари плей-оффнинг илк ўйинини Мехикодаги «Ацтека» стадионида ўтказади.

Таркибдаги ижрочилар бўйича мексикаликлар Эквадордан ортда қолади, лекин Жанубий Америка жамоаси гуруҳ босқичини барқарор ўтказа олмагани ва плей-оффга катта қийинчилик билан чиққанини инобатга олиб, жамоаларнинг имкониятларини тенг баҳолаш мумкин. Эквадорликлар ҳимояда яхши, аммо олдинги чизиқда сифат етишмаяпти. Жамоа дастлабки икки турда Кот-д'Ивуар ва Кюрасао дарвозаси томон ўнлаб зарбалар йўллаб, бирорта гол уролмаганди. Германия билан ўйинда эса эквадорликлар охиригача ҳаракат қилишди ва ирода кўрсатиб, ғалабани илиб кетишди.

Ушбу жуфтлик ғолиби, 1/8 финалда катта эҳтимол билан Англияга тўқнаш келади. Кейинги босқичга ким чиқса ҳам, фаворитга қарши иккинчи рақам остида ҳаракатланишни билади. Ундан олдин эса Мексика ҳам, Эквадор ҳам ўзаро учрашувда барча кучини майдонга ташлашига тўғри келади. Бу жамоалар ҳам икки тенг кучли рақиблардир.