Германия терма жамоасига Клопп келиши мумкин

Германия миллий терма жамоасининг собиқ бош мураббийи Юлиан Нагелсман истеъфога чиққанидан сўнг, таниқли мутахассис Юрген Клопп мамлакат терма жамоасини бошқариш имкониятини кўриб чиқишга тайёр эканини маълум қилди. Унинг таъкидлашича, Германия футболи туб ўзгаришлар арафасида турибди ва йиғилиб қолган муаммоларни ҳал этиш учун жиддий ислоҳотлар зарур.

Фото: REUTERS

Юрген Клопп бу ҳақда 3 июл куни MagentaTV телеканали эфирида сўзлаган.

Бунгача Германия терма жамоаси 2026 йилги жаҳон чемпионатида 1/16 финал босқичида мусобақани тарк этганидан кейин бош мураббий Юлиан Нагелсман лавозимидан кетган эди. Шундан сўнг Германия футбол иттифоқи (DFB) Клопп билан музокаралар ўтказиш ниятида эканини маълум қилди.

Юрген Клопп 2024 йил ўртасида ўз хоҳишига кўра Англиянинг «Ливерпул» клубини тарк этганидан бери мураббийлик фаолияти билан шуғулланмаган. 2025 йил январидан буён у Red Bull компаниясининг глобал футбол йўналиши раҳбари сифатида ишлаб келмоқда.

«Менинг Red Bull билан амалдаги шартномам бор ва мен ҳар доим шартнома бўйича зиммамдаги мажбуриятларга амал қилишга одатланганман. Бироқ музокаралар ўтказишга қизиқишим бор», — деди Клопп.

Унинг фикрича, Германия футболи ҳозир ҳал қилувчи босқичга кирган ва мавжуд муаммолар Юлиан Нагелсман шахси билан боғлиқ эмас. Клоппнинг таъкидлашича, вазиятни яхшилаш учун футбол тизимида кўплаб асосий ўзгаришларни амалга ошириш лозим.

59 ёшли мураббий фаолияти давомида Германиянинг «Боруссия Дортмунд» ҳамда Англиянинг «Ливерпул» клублари билан мамлакат чемпионлиги ва бошқа миллий совринларни қўлга киритган. Шунингдек, у «Ливерпуль» билан UEFA Чемпионлар лигаси ҳамда FIFA клублар ўртасидаги жаҳон чемпионати ғолиби бўлган.

Юлиан Нагелсман Германия терма жамоасини 2023 йилдан бошқариб келган. Унинг раҳбарлигида жамоа Евро-2024 мусобақасида чорак финалгача етиб борган ва кейинчалик чемпион бўлган Испанияга мағлуб бўлган эди.

Бироқ 2026 йилги жаҳон чемпионати Германия учун омадсиз кечди. Терма жамоа 29 июн куни Парагвайга қарши 1/16 финал учрашувида асосий ва қўшимча вақтда 1:1 ҳисобини қайд этгач, пеналтилар сериясида 3:4 ҳисобида мағлуб бўлиб, мусобақа билан хайрлашди.