«Дунё» ахборот агентлиги маълум қилишича, Ўзбекистоннинг Будапештдаги элчихонаси Консуллик бўлимига Сербияда бўлиб турган фуқаро М.Б. ватанга қайтишда ёрдам сўраб мурожаат қилган.
Аниқланишича, фуқаронинг оғир аҳволга тушиб қолишига Сербиядаги иш берувчи томонидан меҳнат шартлари ва эришилган келишувларга амал қилинмагани сабаб бўлган. Бунинг оқибатида у моддий қийинчиликка дуч келиб, Ўзбекистонга мустақил равишда қайтиш имкониятини йўқотган.
Элчихона томонидан кўрилган чоралар ва ўзаро келишувлар натижасида Ўзбекистон фуқароларини қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан ватандошга бепул авиачипта расмийлаштириб берилган.
Қайд этилишича, Ўзбекистоннинг хориждаги дипломатик ваколатхоналари ва консуллик муассасалари чет элда бўлиб турган фуқароларнинг ҳуқуқ ва қонуний манфаатларини ҳимоя қилиш, шунингдек, зарур ҳуқуқий ва амалий ёрдам кўрсатиш ишларини изчил давом эттирмоқда.
