Доналд Трамп яқин муддатда Эроннинг ер остида сақлаётган ядровий иншоотига зарба берилишини маълум қилди. Бу ҳақида президент 21 июл куни Оқ уйда Ливан президенти билан учрашув олдидан ОАВ вакилларининг саволларига жавобан айтиб ўтди.
Трамп ушбу зарба Эрон ядровий дастури билан боғлиқ деб тахмин қилинадиган мустаҳкам ерости иншооти бўлган Пикахе тоғ ҳудудларига бўлишига шама қилмоқда.
АҚШ мудофаа вазири Пит Ҳегсет эса ҳозиргача Эрон билан урушга 37,5 млрд доллар сарфланганини маълум қилди. Бироқ мустақил экспертлар ҳақиқий харажатлар бундан ҳам кўп эканини гапиришмоқда.
Сешанба тушликдан сўнг мудофаа вазири Пентагон харажатларини янада ошириш учун Конгресс сенати олдида чиқиш қилди. Унга АҚШ қуролли кучлари штаб бошлиқлари қўмитаси раиси генерал Ден Кейн ҳамроҳлик қилган. Ҳегсет Эронга Россия ва Хитой жиддий ёрдам бераётганини таъкидлади.
“Иккала давлат ҳам турли даражаларда бўлиб, Эрон қилаётган баъзи ишларни амалга оширишга имкон яратмоқда. Хитой Эронга янги ҳаво мудофааси тизимларини етказиб беришга тайёргарлик кўраётган бўлган. Россия эса Эронга Украинадаги урушдан кейинги илғор дрон тактикалари билан Яқин Шарқдаги АҚШ ва Форс кўрфази давлатлари нишонларига зарба беришда ёрдам бермоқда”, дейди Пентагон раҳбари.
Шунингдек, уруш оқибатида ҳалок бўлган, яраланган ҳарбийлар сони ошаркан, Трамп буни бошқа урушлардаги йўқотишлар билан қиёслашни бошлади. Бу билан президент аввалги урушлар олдида ҳозирги йўқотишлар жуда кам демоқчи бўлмоқда.
Президентнинг Truth Social’да ёзишича, Афғонистондаги 20 йиллик урушда 2000 киши, Ироқдаги 9 йиллик урушда 4600 нафар, Ветнамдаги 19 йиллик урушда 58 220 киши, Корея урушида 3 йил ичида 36 574 киши ҳалок бўлган. Трамп Венесуэладаги ҳарбий операциясини уруш деб атаб, унда ҳеч ким ўлмагани, Эрондаги урушни эса ҳарбий можаро деб атаб, унда атиги 18 киши ҳалок бўлганини қўшиб ўтган. АҚШ ОАВ урушнинг ҳарбий можаро деб кўрсатилишини кенг муҳокама қилмоқда.
Президент рақамларга иқтибос келтирмади, аммо улар мудофаа вазирлиги маълумотларига мос келади, лекин мудофаа қурбонларини таҳлил қилиш тизими Венесуэлани уруш деб тан олмаган.
Кузда Конгрессга сайлов бўлиб ўтади. Уруш сабаб республикачиларнинг мағлубияти янада аниқми? Трампга кўра, йўқ. Бу билан президент оммага таъсир ўтказиш ниятида, урушнинг сайлов натижаларига таъсир қилмаслигини сингдиришга ҳаракат қиляпти.
Гапининг давомида эса Трамп Венесуэладаги операция билан мақтаниб, одамлар бундан қаттиқ таъсирланганини гапирди.
Уруш оқибатида АҚШнинг Яқин Шарқдаги ҳарбий ва авиабазалари ҳужумга учраган. CNN телеканалининг хабар беришича, Америка бу базаларни тиклаш ёки кўрилган зарарни қоплашга пул беришни ҳозирча харажатлари рўйхатига қўшмади.
