Нукус воқелари бўйича судда прокурор Тажимуратовга 18 йил, Қаллихановага 11 йил сўради

Бухоро вилоят суди биносида 2022 йил 1–2 июл кунлари Нукус шаҳрида содир этилган оммавий тартибсизликлар бўйича 22 нафар судланувчига оид жиноят иши очиқ суд жараёнида кўриб чиқишда давом этмоқда. Бугун, 11 январ кунги суд мажлисида тарафларнинг музокаралари эшитилган.

Фото: Олий суд матбуот хизмати

Олий суд матбуот хизмати хабарига кўра, давлат айбловчиси судланувчиларга айбланаётган моддалар бўйича уларнинг айбини енгиллаштирувчи ва оғирлаштирувчи ҳолатларни инобатга олган ҳолда қонунда белгиланган тартибда жазо тайинлашни сўраган.

Gazeta.uz нашрининг суд залидаги иштирок этган манбасига таяниб ёзишича, давлат айбловчиси Нукус воқеаларидаги бош гумондор Даўлетмурат Тажимуратов ва Лолагул Қаллихановага мос равишда 18 ва 11 йил озодликдан маҳрум этиш жазосини сўраган.

Жиноий ишнинг қолган 20 нафар аъзоларидан 18 нафарига камроқ муддатга озодликдан маҳрум этиш жазоси, судланувчиларнинг икки нафарига эса озодликдан чеклаш жазоси сўралган.

Асосий гумондор Даўлетмурат Тажимуратовга моддаларнинг жамланмаси ҳисобига 18 йил, журналист Лолагул Қаллихановага (Нукусда тартибсизликлар рўй берган кунлари ва унгача у Тошкент шаҳрида бўлган) —11 йил озодликдан маҳрум этиш жазоси тайинлаш суддан сўралган.

Ҳар икки гумондорга тиркалаётган айбловда Ўзбекистон Республикаси Жиноят кодексининг 159- (Ўзбекистон Республикасининг конституциявий тузумига тажовуз қилиш), 244- (оммавий тартибсизликлар), 244-1- (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) ва 104- (қасддан баданга оғир шикаст етказиш) моддалари ўрин олган.

Спортчи Азамат Турданов 244-1-моддадан ташқари айни моддалар билан айбланмоқда ва унга 8 йилга озодликдан маҳрум этиш жазоси тайинланиши сўралган.

Ахмет Сметуллаевни 8 йилга, Даўлетмурат Жиемуратовни — 9 йилга, Бахтиёр Қадирбергеновни — 8 йилга, Байрам Сейтниязовни — 7 йилга, Аллабай Токимбетовни — 9 йилга, Қаҳарман Сейтимовни — 6 йилга озодликдан маҳрум этиш сўралган.

Азамат Нуратдиновга давлат айбловчиси 7 йил, Саидабулла Медетовга — 7 йил, Нурлан Найиповга — 7 йил, Пўлат Шамшетовга — 7 йил, Разбек Бекмуратовга — 8 йил, Султанбек Каиповга — 8 йил озодликдан маҳрум этиш жазоси тайинланишини суддан сўраган.

Пўлат Нурниязовни айблов томони 6 йилга, Сайипназар Калимовни — 7 йилга, Нурлан Султамуратовни — 5 йилга, Арислан Темирхановни — 7 йилга ва Амирбек Адилбековни — 7 йилга озодликдан маҳрум этиш сўралган.

Саламат Калилаев ва Бердах Генжебаевга айблов томони 3 йилдан озодликни чеклаш жазоси тайинланишини сўраган.

Аввалроқ Kun.uz’да суд мажлисида давлат айбловчиси (прокуратура) томонидан ўқиб эшиттирилган айблов хулосасининг қисқача мазмуни келтирилган эди.

#Лолагул Қаллиханова #Нукус воқеалари

1-2 июл кунлари Қорақалпоғистон маркази Нукус шаҳрида тартибсизликлар кузатилди. Миллий гвардия ходимлари билан тўқнашувларда 200 дан ортиқ киши яраланган, 18 киши ҳалок бўлган.