Рубио Россиянинг тинчликка тайёрлиги бир неча ҳафта ичида аниқ бўлишини айтди

АҚШ президенти Доналд Трамп Украина бўйича Россия билан «чексиз музокаралар тузоғига тушиб қолиш» ниятида эмас. Бу ҳақда АҚШ давлат котиби Марко Рубио НАТО ташқи ишлар вазирлари саммитидан сўнг маълум қилди, деб ёзди The Guardian.

АҚШ давлат котиби Вашингтон «тез орада» Россия тинчлик келишуви бўйича музокараларда «вақт чўзаётгани ёки йўқлиги»ни аниқлаб олиши ҳақида гапирди.

«Россия тинчликка жиддий ёндашадими ёки йўқми, биз тез орада, ойлар эмас, бир неча ҳафта ичида билиб оламиз. Умид қиламанки, шундай бўлади. Агар бу уруш тугаса, дунё учун яхши бўларди. Лекин биз бу тахминни текшириб кўришимиз кераклиги аниқ», – деди давлат котиби.

Шунингдек, у Украина музокараларга «тайёрлигини намойиш қилгани»ни таъкидлади.

«Руслар бизнинг урушни тугатиш ниятимизни билади ва уларнинг жавобларидан биз яқин орада улар ҳақиқий тинчликка эришишга жиддий бел боғлаганми ёки кечиктириш тактикасини қўллаяптими, билиб оламиз. Агар улар тинчликни кўзлаган бўлса – ажойиб, тинчлик томон ҳаракатланамиз. Агар йўқ бўлса – унда биз ўз позициямизни қайта кўриб чиқишимизга тўғри келади. Агар бу вақт чўзиш тактикаси бўлса, президент Трамп чексиз музокаралар тузоғига тушиб қолишни истамайди», – деди у.

1 апрель куни Fox News ўз манбасига таяниб, Доналд Трамп Россия расмийлари Украинада ўт очишни тўхтатиш бўйича музокараларни атайин кечиктирмоқда, деб ҳисоблаши ҳақида ёзди. Шу сабабли Америка президенти Россия президенти Владимир Путиндан «ҳафсаласи пир бўлган». Телеканал маълумотларига кўра, Оқ уй чекловларни четлаб ўтиб нефтни ташувчи Россиянинг «махфий флоти»га зарба берадиган «агрессив санкциялардан фойдаланиш» вариантини кўриб чиқмоқда.