Биржада шакар ва цемент нархи кўтарилди

Ўтган ҳафта давомида, яъни 10–16 май кунлари "Ўзбекистон республика товар-хомашё биржаси"нинг барча савдо платформаларида 1,2 трлн сўмлик товарлар сотилган бўлиб, бу аввалги ҳафтага нисбатан 29,1 фоизга кам.

Ўтган ҳафта биржанинг пахта ёғи бозорида нархларнинг пасайиш ҳолатлари кузатилди. Хусусан, 10-12 май кунлари биржа савдолари орқали 1 462,0 тонна пахта ёғи сотилган.

Ўтган уч кун мобайнида барча навли пахта ёғининг кунлик ўртача нархлари маҳсулотнинг бир тоннаси учун 16,8 млн сўмдан 14,7 млн сўмгача, яъни 12,4 фоизга пасайди.

Шакар бўйича ички талаб ўсишда давом этмоқда. Бу нархнинг кўтарилишига сабаб бўлди. Ҳафта давомида биржа савдоларига 9 300,0 тонна шакар қўйилди ва ушбу ҳажмнинг барчаси, яъни 100 фоизи сотилган.

Кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 7,2 млн сўмдан 7,5 млн сўмгача, яъни 3,6 фоизга кўтарилди.

Биржанинг цемент бозорида ички талабнинг ўсишига қарамасдан барқарорлик сақланмоқда. Савдоларда иштирок этган харидорларнинг ўртача кунлик сони аввалги ҳафтага нисбатан 2,4 фоизга ўсиб, 714та иштирокчини ташкил қилди.

Ўтган ҳафтада биржа савдоларига 161 026,0 тонна цемент қўйилди ва улардан 140 970,0 тоннаси, яъни 87,5 фоизи сотилди. Ўртача кунлик сотув ҳажмлари 46,9 минг тоннани ташкил қилди.

Кўриб чиқилаётган даврда цементнинг барча категорияси бўйича шаклланган кунлик ўртача нархлар маҳсулотнинг бир тоннаси учун 567,2 минг сўмдан 571,9 минг сўмгача, яъни 0,8 фоизга ўсди.

Ўтган ҳафтада биржада автомобил бензинининг нархи бироз пасайди. Нархлар пасайишига сотувчи-корхоналар томонидан бошланғич нархларнинг пасайтирилгани ўз таъсирини ўтказди.

Сотувчи-корхоналар АИ-80 маркали автомобил бензинининг бошланғич нархларини маҳсулотнинг бир тоннаси учун ўртача 6,6 млн сўмдан 6,6 млн сўмгача пасайтирди. АИ-80 маркали автомобил бензинининг ўртача кунлик нархи ҳам мос тарзда 6,69 млн сўмдан 6,68 млн сўмгача пасайди.