“Ўғлимнинг ўлимида ўзини айбдор қилишяпти” – Наманганда цемент заводи ходими “бункер”да вафот этди

Наманган туманида жойлашган цемент ишлаб чиқарувчи “Toshbuloq invest group” МЧЖнинг махсус қоришма сақланадиган баландлиги 17 метрли махсус “бункер”ига туширилган 18 ёшли ишчиси Баҳром Ҳошимов тозалаш вақтида вафот этган. Бахтсиз воқеани текшириш бўйича махсус комиссия ҳодисага ишчининг ўзи айбдор экани ҳақида хулоса тузган. Марҳумнинг ота-онаси корхона асл ҳолатни яшираётганини, ходимлар у ерга раҳбарият кўрсатмаси билан, белига оддий арқон боғлаган ҳолда туширилганини  айтмоқда. Kun.uz мухбири ҳолатни ўрганди.

{Yii::t(}

Ўтказиб юбориш 6s

Ўтказиб юбориш

Ҳодиса 2025 йил 28 ноябр куни соат 10:30 ларда юз берган. Гувоҳларнинг тасвирлашича, Баҳром Ҳошимов цемент маҳсулоти таркибига қўшилувчи махсус қоришма сақланадиган “бункер”га бахтсиз ҳодиса юз беришидан аввал ҳам тушириб келинган. Марҳумни «бункер»га тушириб унинг тепасида назорат қилиб турадиган ходим ўша куни иш билан бошқа томонга кетиб қолган. Тахминан 6 дақиқа ўтиб иш жойига қайтган ходим Баҳром Ҳошимовнинг ўпирилиб кетган қоришма ичидан қўлини чиқариб, ёрдам сўраётганини кўриб қолган.

Меҳнат муҳофазаси инскпекцияси томонидан ишлаб чиқаришда бахтсиз ҳодиса ва саломатликка бошқа хил зарар етказилиши тўғрисида Н-1 шаклидаги тузилган далолатномада ҳам марҳум ҳеч ким топшириқ бермаган бўлса-да, белига арқонни боғлаб ишлаб турган бункер ичига ўз ихтиёри билан тушгани учун ўлим ҳолати юз бергани қайд этилган.

Ваҳоланки, шу пайтгача корхона ходимлари хавфли тарзда белига оддий арқон боғланиб махсус бункерга мунтазам равишда тушириб келинган. Буни марҳумнинг яқинлари корхона ишчилари орқали аниқлаштирган. Ўша куни бункер тепасида марҳумни кузатиб турган назоратчи воқеа жойидан кетиб қолган. Бир муддатдан кейин келиб бункер ичидаги ўпирилган қоришма ичига тушиб кетган ҳамкасбининг қўлини кўриб қолиб, атрофдагиларни ёрдамга чақирган.

Барча уринишлар бесамар кетиб, Баҳром Ҳошимовнинг мурдаси 40 дақиқадан сўнг бункер оғзидан чиқариб олинган.

Ишни ёпишга ҳаракат қилишяпти...

“28 ноябр куни ўғлим мендан дуо олиб ишга чиқиб кетган эди. Ишхонасида хавфли бункерга тушиб, болам Аллоҳга омонатини топшириб бўлган экан. Қўнғироқ қилишиб ўзининг эҳтиётсизлиги, ўзининг айби билан йиқилиб тушиб ўлди, дейишди. Бошида бу гапларга ишондим.

Кейинчалик корхона раҳбариятининг ёлғонлари фош бўлди. Ишни ёлғон билан бошлашди ва ҳозиргача ёлғон билан давом эттиришяпти. Суриштирсак, ўғлим йиқилмаган экан. Доимий равишда хавфли бўлган бункер ичига тушиб юрган. Ўз хоҳиши билан эмас, бошлиқлари томонидан мажбуран туширилган. Иш берувчи жавобгарликдан қочиш учун ўзи ҳеч ким айтмаса ҳам ичкарига тушиб юрган, деб ҳужжат расмийлаштирган. Ходимлардан сўрадик, хавфли бункерга оддий молнинг арқонини белига боғлаб, доимий равишда ишчилар туширилган. Ўғлим чет тилларини биладиган, онгли бола эди. Буйруқ берилмаса, ҳеч қачон ўзи қилиши керак бўлмаган ишларга бурнини суқадиган бола эмасди. 

3 ўғлим бор. Марҳум Баҳромжон иккинчиси эди. Турмуш ўртоғим ярим жон, хасталиги бор. Оилада етишмовчиликлар сабаб ёрдам бериш учун цемент ишлаб чиқарувчи корхонага кирган эди. Хонадонимизда яхши муҳит бўлишини хоҳлаганидан менга ёшлигиданоқ кўмакчи бўлган.

Ўғлимдан доим хавотир олганман. Хавотиримга асос ҳам бор эди. Чунки ундан олдин ҳам ўша корхонада икки марта тан жароҳати олган эди. Худди ўша корхонада, худди ўша иш жойида олинган жароҳатни ҳам корхона ёпганди. Ўғлим ўлган жойни, тушган бункерни ҳам кўрдим, инсон зоти тушиши мумкин бўлмаган жойга мажбуран туширилган. Нима учун тушиши мумкин бўлмаган жойга боламни туширди улар? Қонун олдида жавоб беришсин. Ишни ёпиш учун айбни боламнинг ўзига ағдариб, ҳужжатлар расмийлаштиришди.

Ўғлим заводда энг ёш, энг тажрибасиз ходим эди. “Бу сенинг хизмат вазифанг, бу сенинг ишинг”, деб юклатилганки, бу бола уни одатдагича иш вазифам бункерга тушиш экан, деб тушунган”, дейди марҳумнинг онаси Наргиза Қуронова. 

Хавфли бункерга мажбуран туширилган...

“Ўғлим билан битта корхонада ишлаймиз, цехимиз бошқа. 28 ноябр куни ўғлим билан бирга ишхонага бордик. У ўзининг цехига кириб кетди. Мен ўзимнинг цехимга кириб иш қилаётган эдим.

Ўғлимни тушиши мумкин бўлмаган бункер ичига туширишган. Белига оддий арқон билан боғлаб туширишган. Ундан олдин бир-икки ходимга айтишган, улар тушмайман, қўрқаман, деган. Бу ёшлик қилган, тушасан, сен шу ерда ишлайсан деса, тушиб кетган. Туширган бола ҳам бункер тепасида назорат қилиб турмай жойидан кетиб қолган. Ўша тепада турган назоратчи 6 дақиқадан кейин келса, ўғлимнинг қўлини чиқариб, ёрдам сўраганини кўриб қолган. Боламни агарка ичидан олиб чиқишнинг иложи бўлмаган. 40 дақиқалар кейин бункер тагини болгаркада қирқиб, ўлигини чиқаришди. Марҳум Баҳромжоннинг ишга кирганига эндигина 3 ой бўлган, мактабни тамомлаган ўспирин эди.

Корхона томонидан жуда лоқайдлик қилинган. Ҳолат содир бўлганида электрикларга алоқага чиқиб, барча дастгоҳларни ўчиришганида, ўғлим тирик қолган бўларди. Керак бўлса заводни бир дақиқада ўчириши мумкин эди.

Корхонага қонуний чора кўрилишини, айбдорлар қонун доирасида жазо олишларини хоҳлайман”, дейди марҳумнинг отаси Баҳодир Қуронов.

“Ходимларга бункерга тушмаслик тайинланган”

Бахтсиз ҳодиса юзасидан изоҳ олиш учун “Тошбулоқ инвест гроуп” МЧЖга бордик. Корхона меҳнат муҳофазасига масъул ходим Дилшод Мирзабоев айбни марҳумнинг ўзига юклади.

“Марҳум Баҳром Ҳошимов корхонада 8 сентябрдан иш бошлаган. Аслида бункер ичкарисига тушиш мумкин эмас. Одатда бункер ичидаги агарка маҳсулоти ҳаво билан ҳайдаб пастга туширилади. Аслида тартиб бўйича бункер таъмирланаётган пайтда завод ишламаётган пайти, икки ва ундан ортиқ киши тушиши ва тепада раҳбарият унга назорат қилиб туриши керак. Марҳум ходимнинг у ерга нима учун тушганига ҳайронмиз. Йўриқномалар берилган. У ерга тушмаслик тайинланган ҳаммасига”, дейди у.

Ҳолат юзасидан тўлиқроқ маълумот олиш учун марҳум билан бирга ишлаган ходимлар билан суҳбатлашмоқчи бўлдик. Лекин номаълум сабабларга кўра вазият юзасидан фикр билдиришни истамади.

Айни пайтда ҳолат юзасидан Наманган тумани ИИБ томонидан жиноят иши қўзғатилиб, дастлабки тергов ҳаракатлари олиб борилмоқда. Хозирча ходимнинг иш жойида вафот этгани муносабати билан товон пули ва компенсация масаласи очиқ қолмоқда.

Марҳумнинг яқинлари тегишли идоралардан ҳолатни адолатли ўрганиб, айбдорларга қонуний чора кўрилишини сўрамоқда.

Сарвар Зиёев,
Сардор Мамиров,
Kun.uz