"Ўзбекинвест" суғурта компанияси ва Chartered Insurance Institute (Лондон) ўртасида ҳамкорлик меморандуми имзоланди

Мазкур меморандум юртимиз суғурта соҳасидаги мутахассислар учун халқаро даражадаги таълим, малака, шунингдек, уларнинг касбий малакаларини оширишда ижобий самара бериши кутилмоқда.

"Chartered Insurance Institute" 1912 йилда ташкил этилган бўлиб, суғурта соҳасидаги глобал таълим муассасаси ҳисобланади, ташкилотнинг сертификатлари бутун дунёда тан олинган.

Келишувга кўра, "Chartered Insurance Institute"нинг акредитациядан ўтган маркази (APDC) пойтахтимиздаги университетлардан бирида ташкил этилади. Умуман олганда, дунёнинг кўп шаҳарларида ташкил этилган бундай марказлар CII аккредитациясидан ўтган инструкторларни, шунингдек, Қирол Чарлз III ҳомийлигида яратилган ўқув материалларини тақдим этади.

"Chartered Insurance Institute" қуйи даражадаги сертификат эгасидан тортиб, то илғор касбий унвонга эга мутахассисларни тайёрлайди. Институт томонидан энг юқори даража учун бериладиган сертификат халқаро миқёсда тан олиниб, суғурта соҳасидаги билим ва профессионалликнинг энг юқори нуфузини англатади.

CII кўмагида ташкил этиладиган касбий ривожланиш марказини ташкил қилиш, Ўзбекистонда энг юқори таълим стандартларига мувофиқ суғурта кадрларини касбий ривожлантириш ва қайта тайёрлаш ҳамда тегишли халқаро сертификатларни олиш имкониятларини сезиларли даражада кенгайтиради.

Таълимнинг дастлабки дастурлари ва курслари 2024 йилнинг IV чорагида ўз фаолиятини бошлаши кутилмоқда.

 Колл-марказ: (+998) 71−207−60−00, 1160

Сайт | Facebook |Instagram | Telegram | YouTube

Реклама ҳуқуқи асосида