Европа давлатлари: Трампнинг таҳдидларига жавоб якдил бўлади

Тарифлар жорий этиш ҳақидаги таҳдидлар “трансатлантик муносабатларни емирмоқда” ва Гренландия атрофидаги вазиятда “хавфли ёмонлашув спирали” юзага келиш хавфини оширмоқда. Бу ҳақда якшанба, 18 январ куни Германия ҳамда АҚШ президенти Доналд Трамп 1 февралдан бошлаб 10 фоизлик бож жорий этиш билан таҳдид қилган Европа давлатларининг яна еттитаси қўшма баёнотида айтилди.

“Бизнинг жавобимиз бундан кейин ҳам якдил ва мувофиқлаштирилган бўлади. Биз суверенитетимизни ҳимоя қилишга содиқмиз”, — деб таъкидланади федерал ҳукумат матбуот хизмати тарқатган ҳужжатда.

“Биз Дания Қироллиги ва Гренландия халқи билан тўлиқ ҳамжиҳатмиз”, — дейилади баёнот муаллифлари томонидан. Улар ўтган ҳафта ишга туширилган жараёнга таяниб, “суверенитет ва ҳудудий яхлитлик тамойилларига асосланган” мулоқотга тайёр эканини билдирди. Бу тамойилларни “мустаҳкам қўллаб-қувватлашини” Дания, Финландия, Франция, Германия, Нидерландия, Норвегия, Швеция ва Буюк Британия қайд этган.

НАТО аъзолари бўлган ушбу давлатлар, ҳужжатга кўра, “Арктикада хавфсизликни мустаҳкамлашни умумий трансатлантик вазифа сифатида” қўллаб-қувватлайди.

Баёнотда, шунингдек, Дания томонидан олдиндан келишилган Arctic Endurance (“Арктик чидамлилик”) номли машқлар иттифоқчилар билан ҳамкорликда ўтказилаётгани айтилган. “Улар ҳеч ким учун таҳдид эмас”, — дея урғу берилади.

Аввалроқ Бундесвернинг оператив қўмондонлиги вакили 15 нафар бундесвер ҳарбий хизматчисидан иборат гуруҳ режа асосида 18 январ куни — Трамп таҳдидларидан кейинги куни Гренландияни тарк этганини билдирган.

“Разведка миссияси натижа берди, барча мамнун, ҳозир Германияда уни баҳолаш жараёни кетмоқда”, — деган у.

Ҳарбий миссия муддатидан олдин тўхтатилгани ҳақидаги даъвони рад этган: “Разведка режага мувофиқ якунланди”, — дейди у. Унинг сўзларига кўра, немис ҳарбийлари Рейкявикка учиб кетган, у ердан Копенҳагенга йўл олади.

Bild таблоиди ҳисоб-китобига кўра, бундесвернинг Гренландиядаги миссияси 44 соат давом этган. Нашр даъво қилишича, оролни тарк этиш буйруғи 18 январ эрталаб Берлиндан келган. Дания раҳбарлигидаги миссияда Франция, Швеция ва Норвегия ҳарбийлари ҳам иштирок этган.

Доналд Трамп 17 январ куни Германия, Дания, Буюк Британия, Нидерландия, Норвегия, Финландия, Франция ва Швеция учун 1 февралдан АҚШга етказиб бериладиган товарларга 10 фоизлик тариф жорий этилишини эълон қилган. АҚШ президентига кўра, 1 июндан божлар 25 фоизгача оширилади.

Reuters агентлиги аниқлаштиришича, тарифлар амалдаги божлардан ташқари равишда жорий этилади. Трампнинг сўзларига кўра, йиғимлар “Гренландияни тўлиқ ва якуний сотиб олиш бўйича келишувга эришилмагунча” ундирилади. У АҚШ “бу операцияни 150 йилдан зиёд вақт” амалга оширишга уринганини, бироқ Дания рад этганини ҳам қўшимча қилган.