Ташиев давлат тўнтаришига уринишга алоқадорликда гумонланмоқда

Унинг ўзи айбдор эмаслиги ва оқланишига шубҳа қилмаслигини айтиб, ўз тарафдорларини тинчланишга чақирган.

Фото: gov.kg

Қирғизистон Миллий хавфсизлик давлат қўмитаси (МХДҚ)нинг собиқ раиси Қамчибек Ташиев давлат тўнтаришига уриниш бўйича жиноий ишда фигурантга айланганини маълум қилди.

«Менга нисбатан қўзғатилган жиноят иши юзасидан баёнот бериш муҳим, деб ҳисоблайман. Бу иш бўйича тўлиқ юридик ҳимояланиш имкониятига эгаман, айбим йўқ, оқланаман», – деган у.

Ташиев ўз тарафдорларига юзланиб, «барчаси қонун доирасида бўлиши лозимлиги»ни қайд этган: «Бирор-бир оммавий ёки бошқача ҳаракатларга эҳтиёж йўқ деб ҳисоблайман. Сизлардан мен учун қайғурмасликни ва хавотир олмасликни сўрайман», – дея қўшимча қилди у.

Аввалроқ 24.kg нашри адвокатларга асосланиб, Ташиев, шунингдек, собиқ бош прокурор (2022-2024) Курманкул Зулушев ва парламентнинг собиқ спикери Нурланбек Турғунбек уулу Ички ишлар вазирлиги бош тергов бошқармасида сўроқ қилингани ҳақида хабар тарқатганди. Улар давлат тўнтаришига уринишда гумонланаётгани айтилган.

Қамчибек Ташиев 2020 йил октябридан Қирғизистон Миллий хавфсизлик давлат қўмитаси раиси лавозимида ишлаган, 2026 йил 10 феврал куни мамлакат президенти Садир Жапаров уни лавозимидан озод этган. Бу истеъфо қатор жамоат арбоблари ва сиёсатчилар мамлакат президентлиги учун навбатдан ташқари сайловлар ўтказиш ташаббуси билан чиқиши ортидан рўй берганди. Ўшанда тегишли мурожаатни 75 киши имзолаган. Кейинроқ улардан беш нафари қўлга олинади.

Президент ўз қарорини жамиятдаги бўлинишнинг олдини олиш истаги билан изоҳлаган. Унга кўра, низо парламентда чиққан: у ерда депутатларни тарафларга ажратиш, «генерал» билан қўрқитиш, кейин эса муддатидан олдин сайловлар ўтказиш учун имзо тўплаш бошланган.

Ташиевнинг истеъфоси ортидан ҳукуматда ҳам ўзгаришлар рўй берди. Хусусан, Фавқулодда вазиятлар вазири, Табиий ресурслар ва экология вазири, соғлиқни сақлаш вазири, шунингдек, Вазирлар маҳкамаси раисининг икки ўринбосари ишдан кетди. Парламент спикери Нурланбек Турғунбек уулу эса аввалига лавозимини тарк этди, кейинроқ депутатлик мандатини ҳам топширди.

Апрел ойи ўрталарида Қирғизистонда Миллий хавфсизлик давлат қўмитаси раиси собиқ ўринбосарлари Тимур Шабданбеков ва Даниэл Рисалиев қўлга олинди. Улар мансаб ваколатини суиистеъмол қилиш ва коррупцияда гумонланмоқда. Ҳар икки мулозим Ташиев ишдан бўшатилганидан сўнг ўз лавозимини тарк этганди.

28 апрел куни Садир Жапаров Kaktus.media учун берган интервюсида Ташиевнинг давлат тўнтаришига уринишга алоқаси бор ёки йўқлигини тергов ва суд белгилашини айтиб ўтди.