Туапседа Украина ҳужумидан кейин «нефт ёмғири» ёғди

20 апрел куни Россиянинг Туапсе шаҳрида «нефт ёмғири» кузатилди – бу украин ҳарбийларининг маҳаллий портдаги нефт қуйиш терминалига ҳужумидан кейин рўй берган.

«Теварак-атроф мойли парда ва қора шарчалар билан қопланди. Аввалига оддий чанг деб ўйлагандик, лекин кейинроқ бу ёниб кетган нефт қолдиқларига ўхшаб кетишини тушундик», – деган гувоҳлар Astra нашрига.

Туапсега дронлар ҳужуми душанбага ўтар кечаси бўлиб ўтганди. Ҳужум оқибатида бир киши ҳалок бўлиб, яна уч киши яраланган. Маҳаллий расмийларга кўра, дронлар бир неча биноларга, жумладан, кўп квартирали уй, мактаб, болалар боғчаси, черков ва музейга зарар етказган.

Украина қуролли кучлари бош штаби ҳужумдан кейин дронлар нишони Туапседаги денгиз терминали билан биргаликда ягона ишлаб чиқариш комплексини ташкил этувчи нефтни қайта ишлаш заводи бўлганини маълум қилди.

Портда ҳужумдан кейин кучли ёнғин бошланган ва бу ёнғин сешанба куни ҳам тўлиқ ўчирилмаганди. Сунъий йўлдош орқали олинган тасвирлар ёнғин ичида қолган нефт резервуарларидан чиққан тутун 300 километрга чўзилгани ва Ставрополгача етиб борганини кўриш мумкин.

Роспотребнадзор 20 апрел куни «ёнғин ҳудудидаги фуқаролар»ни деразаларни очмаслик ва уйдан чиқмасликка, зарурат туфайли кўчага чиққанда ниқоб ва респираторлардан фойдаланишга чақирган. Шу билан бирга, бундан бир неча соат олдин (ёнғин аллақачон бошланганида) регион тезкор штаби телеграм-каналида ҳаводаги зарарли моддалар миқдори «нормадан ошмагани» таъкидланган эди. Тезкор штаб ҳавонинг ҳолати кунига уч марта ўлчанишини маълум қилган, лекин ўтган вақт ичида ўлчаш натижалари ҳақида бирорта ҳам хабар чиқарилмади.

Украинанинг Туапсега бу сафарги ҳужуми сўнгги тўрт кун ичида иккинчиси бўлди, бундан олдинроқ дронлар шаҳарга 16 апрел куни ҳам учиб келганди. Ўшанда икки бола ҳалок бўлиб, яна етти киши яраланганди. Портда ҳам ёнғин чиққан ва уни ўчиришга уч кун вақт кетганди.

20 апрел куни регион оперштаби биринчи ҳужумдан кейин Қора денгизда 10 минг квадрат метр майдонда нефт доғи пайдо бўлганини хабар қилганди; уни тўхтатиш учун тўсиқлар ўрнатилган. Ёқилғи Туапсе дарёсига ҳам тушган, у ерда ҳам ҳолат назоратга олинган.