Зеленский ва Макрон «тарихий келишув» имзолади

Украина президенти Володимир Зеленский Францияга борди ва Эммануэл Макрон билан учрашув ўтказди. Улар Париж яқинидаги Виллакубле авиабазасининг учиш-қўниш йўлагидаёқ мудофаа соҳасидаги режалар тўғрисидаги декларацияни имзолади. Шу кунларда Зеленский бу келишувни «тарихий» деб анонс қилганди.

2035 йилга қадар мўлжалланган ушбу келишувнинг асосий банди – Rafale русумли 100 та қирувчи самолёт етказиб бериш билан боғлиқ. Ҳозирча бундай ҳарбий ёрдам қандай ва ким томонидан молиялаштирилиши аниқ эмас. Reuters агентлиги ўз манбасига таяниб, айрим самолётлар тўғридан тўғри Францияда мавжуд захиралардан олиб берилиши мумкинлигини ёзган.

Зеленский ижтимоий тармоқда ёзишича, томонлар Rafale самолётларидан ташқари, Франция ва Италия ҳамкорлигида ишлаб чиқарилган SAMP/T ҳаво ҳужумидан мудофаа тизимлари, ушбу тизимлар учун радарлар, шунингдек, «ҳаво-ҳаво» синфидаги ракеталарни етказиб бериш бўйича келишиб олган. Шунингдек, Зеленскийнинг сўзларига кўра, Украина ва Франция шу йилнинг ўзида биргаликда тутиб олувчи дронлар ишлаб чиқаришни йўлга қўяди.

Келишув имзолангач, Зеленский ва Макрон АҚШ урушдан тобора узоқлашаётган, Европа Иттифоқида эса Киевни қўллаб-қувватлашни камайтириш тарафдорларининг позициялари кучайиб бораётган бир шароитда Украинага узлуксиз ёрдам кўрсатиш учун Франция ва Буюк Британия ташаббуси билан тузилган «кўнгиллилар коалицияси» штаб-квартирасига ташриф буюрди.

Макрон матбуот анжуманида Украинани «Европанинг биринчи мудофаа чизиғи» деб атади ва Европа давлатларининг Украина армиясига ёрдами «барча учун хавфсизлик»ни таъминлашини таъкидлади.

Париждан кейин Зеленский Мадридга йўл олади. Унинг Испанияга ташрифи тафсилотлари ҳозирча ошкор қилинмаяпти, бу уруш давридаги иккинчи ташриф бўлади.

Бир ой олдин Зеленский Украинага Швециянинг 100 дан 150 тагача Gripen қирувчи самолётларини етказиб беришни назарда тутувчи декларацияни имзолаган эди. Бу самолётлар бир неча йил давомида етказиб берилиши кўзда тутилган. Зеленский дастлабки самолётлар 2026 йилдаёқ Украинага етиб келишига умид қилмоқда. Самолётлар учун ким тўлаши ҳозирча номаълум, Швеция расмийлари бу Россиянинг музлатилган активлари ҳисобига бўлишини истисно қилмаган.

Reuters манбалари таъкидлашича, Rafale ва Gripen самолётларини етказиб бериш бўйича келишувлар Киевнинг ҳарбий самолётлар паркини 250 тага етказиш бўйича узоқ муддатли стратегияси доирасида тузилган. Ҳозирда тахминий ҳисоб-китобларга кўра, Украинада атиги бир неча ўн жанговар самолёт қолган.