Бино маданий мерос объекти эканини қандай аниқлаш мумкин?

АОКАда ўтказилган Маданий мерос агентлиги матбуот анжуманида маданий мерос объектлари рўйхатини ҳамма учун очиқ платформага жойлаш ёки уларни электрон каталогга ўтказиш масаласи кўтарилди.

Агентлик директори Шаҳриёр Нуруллоевнинг жавоб беришича, маданий мерос объектлари жамоатчиликдан беркитилмайди. Объектнинг маданий меросга кириш-кирмаслигини бир неча усул билан текшириш имкони бор.

“Lex.uz порталида Вазирлар Маҳкамасининг 2019 йилда чиққан 846 қарори бор. Унда 8209та объект манзили билан номма-ном, туманма-туман ҳаммаси ёзиб чиқилган. Археологик бўлса, археологик объект, архитектура бўлса, архитектура объекти дейилган. Шу ердан ҳам объектларни текширса бўлади. Бундан ташқари, бундай объектлар расмлари билан порталимизда ҳам бор эди. Техник сабабларга кўра, ҳозир иш тўхтаб қолди”, – деди агентлик раҳбари.

Шунингдек, Нуруллоевга кўра, madaniymeros.uz сайтидан ҳам муҳофазадаги объектлар билан танишиш мумкин. У ерда ҳар бир объект илмий экспорт кенгаши хулосаси баёни билан рақамлаштирилган ҳолда жойлаштирилган.

“Баъзи ташкилотлар, – дейди агентлик раҳбари, – маданий мерос объекти ҳисобланган бинони эътибор бермай аукционга қўйган ёки бошқа ҳолатлари учун биз жавоб беролмаймиз. Лекин аниқласак, чора кўрамиз”.