Сербияда мухолифатчилар ва президент тарафдорлари тўқнашди

Чоршанба куни Сербия пойтахти Белград, шимолдаги Нови Сад, жанубдаги Ниша, марказдаги Крагуевац ва бошқа бир қанча шаҳарларда мамлакат президенти Александр Вучичнинг мухолифлари унинг тарафдорлари ва полициячилар билан тўқнашди.

Президент партиясининг ҳудудий офислари олдида тўпланган томонлар бир-бирларини мушаклар билан ўққа тутган, петардалар, тошлар ва турли буюмлар улоқтирилган, муштлашувга киришишган, полиция эса уларни ажратишга ҳаракат қилган.

Президент Вучич чоршанба куни кечқурун Нови Садда 64 нафар тарафдори жароҳат олганини айтди ва «босмачилар ва безорилар»га шафқат қилинмаслигига ваъда берди. Вучич Белграддаги штаб-квартира олдида тўпланган партиядошлари қаршисига чиққан.

Сербия полицияси бошлиғи Драган Василевичнинг маълум қилишича, мамлакат шимолидаги Врбас шаҳарчасининг ўзида юз берган тўқнашувларда 16 нафар полициячи ва 50 нафар намойишчи яраланган.

BBC Сербия хизматининг қайд этишича, камида Нови Саддаги тўқнашувлар кечгача давом этган ва жабрланганларнинг аниқ сони ҳозирча маълум эмас.

Талабалар ташкилотлари бошчилигидаги серб мухолифати тўққиз ойдан бери норозилик намойишларини ўтказмоқда. Намойишлар ўтган йил 1 ноябр куни Нови Сада вокзалида темир-бетон соябон қулаб тушгани ва 16 киши ҳалок бўлгани ортидан бошланган.

Намойишчилар ушбу фожиада айбдорларни жазолашни, коррупцияга қарши курашни кучайтиришни, шунингдек, навбатдан ташқари сайловлар эълон қилишни талаб қилмоқда.

Ҳозирча улар бош вазирнинг истеъфосига эришган, бироқ президент Вучич истеъфога чиқмоқчи эмас.

BBC Сербия хизматига кўра, бу сафар тўқнашувлар 12 августдаёқ бошланган. Белград, Ниша ва мамлакат шимолидаги Врбас ва Бачка Паланка шаҳарларида намойишчилар президент партиясининг ҳудудий офисларига келишган. Врбасда уларга Вучичнинг ниқоб таққан тарафдорлари тўқмоқлар билан ҳужум қилишган.

Шу билан бирга, полиция партия идоралари атрофини ўраб олиб, томонларни ажратишга ҳаракат қилган.

Шундан сўнг намойиш ташкилотчилари ўз тарафдорларини 13 август куни Сербия тараққийпарвар партиясининг бошқа шаҳарлардаги офисларига чиқишга чақирган.

Тўқнашувлардан ташқари, норозилик намойишлари иштирокчилари баъзи жойларда йўлларни тўсиб қўйишган.

Тўқнашувлар ва тартибсизликларни уюштирганларни нафақат ҳокимият, балки мухолифатдаги сиёсий партияларнинг сиёсатчилари ҳам қоралади.