Тамаки чекувчилар йилига 2,5 ҳафта камроқ ишлайди — тадқиқот

Британиянинг YouGov бозор тадқиқоти ва маълумотлар таҳлили компанияси тамаки чекувчилар қанча вақтини чекишга сарфлашини ҳисоблаб чиқди, деб хабар беради Bild.

Қайд этилишича, тамаки чекишга бир ҳафтада ўртача 2 соатдан ортиқ вақт кетади ва бу бир йилда 92 соатга етади (таътил ва байрамлар қўшиб ҳисобланганда).

Шундай қилиб, чекувчилар ҳар йили қўшимча «2,5 ҳафта таътил» олади. Респондентларнинг 69 фоизи иш куни давомида чекиш учун танаффус қилмайди. Сўровда иштирок этганларнинг ярмидан кўпи бундай танаффуслар иш тартибида назарда тутилган тушлик ёки дам олиш вақтлари доираси амалга оширилмаслигини тан олган.

Шу билан бирга, чекувчиларнинг аксарияти ўзларининг чекмайдиган ҳамкасблари улар қўшимча танаффус олишларидан ғазабланмасликларини маълум қилган. Ҳар беш нафар чекувчининг фақат биттаси бу борада салбий қарашларга дуч келишини билдирган.

Аввалроқ Мичиган университети олимлари ҳар қандай ёшда ҳам тамаки чекишдан воз кечиш инсон соғлиғи учун фойдали ва умрни узайтиришини аниқлаган эди. Тамаки тутуни таркибида минглаб заҳарли моддалар мавжуд бўлиб, у тананинг деярли барча органларига зарар етказади ва саратоннинг кўплаб турларини, инсульт, юрак ва ўпка касалликларини келтириб чиқаради.